Ці можна атрымаць «дэкрэтныя» ў Польшчы, калі працуеш па ўмове злецэння?
У Польшчы часта наймаюць не па працоўнай дамове, а па ўмове злецэння, грамадзянска-прававой дамове. Але ці можна прэтэндаваць у такім выпадку на дэкрэтныя выплаты? Разбіраўся Dzik Pic.
Што такое ўмова злецэння?
Umowa zlecenie — гэта грамадзянска-прававы від дамовы. То-бок ён рэгулюецца не працоўным кодэксам, а грамадзянскім.
Сутнасць простая: выканаўца падручаецца выканаць пэўную задачу для заказчыка і, калі іншае не агаворанае ў дамове, можа скасаваць умову без усялякіх дысцыплінарных мер.
Але ў гэтай свабоды ёсць іншы бок. Напрыклад, выканаўца не бярэ адпачынку або аплаты за перыяд хваробы (толькі калі бакі пра гэта спецыяльна не дамовіліся).
Кліент «падпісвае» падрадчыка на абавязковыя ўзносы ў ZUS, а менавіта: на медыцынскае і пенсійнае страхаванне; страхаванне па інваліднасці і ад няшчасных выпадкаў.
А вось страхаванне на выпадак хваробы (ubezpieczenie chorobowe), якое пакрывае часовую непрацаздольнасць, лічыцца неабавязковым. Плюс яго можна выплачваць, толькі калі падрадчык ужо плаціць абавязковыя ўзносы на пенсію і страхаванне па інваліднасці.
Дзеля ўсяго дзеля нагадаем, што людзі да 26 гадоў са статусам навучэнца/студэнта і ўмовай злецэння вызваляюцца ад ZUS.
Ці можна браць дэкрэт, калі вы працавалі па ўмове злецэння?
Паводле працоўнага кодэкса, не. Такое права даецца толькі тым, хто знаходзіцца ў працоўных адносінах, а злецэнне сюды не залічваецца.
Аднак жанчына заслугоўвае так званы «urlop macierzyński zleceniobiorcy». Пры адной умове: што на дзень родаў у жанчыны ёсць страхаванне па хваробе (ubezpieczenie chorobowe).
Тэрмін выплаты дапамогі па цяжарнасці і родах (zasiłek macierzyński) залежыць ад колькасці народжаных (або ўсыноўленых) за раз дзяцей:
1 дзіця — 20 тыдняў;
2 дзяцей — 31 тыдзень;
3 дзяцей — 33 тыдні;
4 дзяцей — 35 тыдняў;
5 + дзяцей — 37 тыдняў.
І потым яшчэ можна будзе ўзяць адпачынак па доглядзе дзіцяці (urlop rodzicielski):
1 дзіця — 41 тыдзень
2 і больш дзяцей — 43 тыдні.
На які памер «zasiłka macierzyńskiego» можна разлічваць?
Сума дапамогі грунтуецца на памеры сярэдняй заработнай платы за апошнія 12 месяцаў працы. Калі ўмова злецэння доўжылася менш за 12 месяцаў, то сярэдні паказчык вылічваецца на аснове тых перыядаў, калі дамова фактычна выконвалася.
Гэта значыць, як і ў выпадку маці з працоўнай дамовай, пакуль вы знаходзіцеся ў «macierzyńskim urlope», то атрымліваеце сваю сярэднюю зарплату.
Калі ж падаць на працягу 21 дня ад моманту родаў заявы і на «urlop macierzyński», і на «rodzicielski», каб яны ішлі адзін за адным, то дапамога па цяжарнасці і родах будзе паступаць у памеры 81,5% ад разліковай базы за ўвесь перыяд «адпачынку».
А калі бацька таксама працуе па ўмове злецэння, ці мае ён права на адпачынак па доглядзе дзіцяці?
Калі коратка, то так, на 2 тыдні. Але толькі калі ён таксама выплачвае страхаванне па хваробе, і падасць заяву хоць бы за 7 дзён да пачатку адпачынку.
Читать на dev.by