Джуна на размеркаванні скарацілі з EPAM. Так можна? Што цяпер?
Распрацоўшчыка размеркавалі пасля ВНУ ў EPAM. Ён думаў, што яго не звольняць. Але памыліўся.
Малады айцішнік прыйшоў у EPAM яшчэ студэнтам два гады таму, а пасля ВНУ застаўся там працаваць па размеркаванні. З абавязковых двух гадоў адпрацоўкі заставалася паўгода, калі ў кампаніі пачаліся звальненні.
— Першапачаткова менеджары казалі, што звольніць мяне не могуць, бо я на размеркаванні, аднак мне зрэзалі заробак удвая. А потым выявілася, што пад скарачэнне я ўсё ж такі трапляю. Усё па законе.
За два месяцы да звальнення мяне апавясцілі, што трэба шукаць новае месца. Праз два месяцы ўжо даводзіцца пераразмяркоўвацца.
Разам з паведамленнем аб звальненні мне далі на выбар два варыянты:
1) я сыходжу ў той жа дзень, калі падпісваю апавяшчэнне аб звальненні, з выплатай 5 заробкаў (пры гэтым бярэцца сярэдняя зп за 2 апошнія месяца, то-бок паменшаная ў 2 разы);
2) я працую яшчэ 2 месяцы, пры гэтым мне вяртаюць ранейшую, вышэйшую, зарплату. Аднак пасля звальнення выплачваюць 3 заробкі замест 5 (з разліку сярэдняй зп за 2 апошнія месяцы, то-бок звычайнай, не паменшанай).
Я выбраў другі варыянт. Ён нядрэнны, але ўсё роўна крыўдна: лепш бы замест кампенсацыі кампанія проста пакінула мяне да канца размеркавання.
Дарэчы, у паведамленні прычынай звальнення было пазначана тое, што кампанія не можа выконваць свае абавязкі наймальніка.
У студзені мяне звольнілі. Адначасова EPAM накіраваў апавяшчэнне ў ВНУ, што я скарочаны згодна з п. 1 артыкула 42 Працоўнага кодэкса РБ.
Артыкул 42. Скасаванне працоўнай дамовы з ініцыятывы наймальніка
Працоўная дамова, заключаная на нявызначаны тэрмін, а таксама тэрміновая працоўная дамова да заканчэння тэрміну яе дзеяння могуць быць скасаваныя наймальнікам у выпадках:
1) ліквідацыі арганізацыі, спынення дзейнасці філіяла, прадстаўніцтва або іншага адасобленага падраздзялення арганізацыі, размешчаных у іншай мясцовасці, скарачэння колькасці або штату работнікаў;
Якія цяпер у мяне сцэнары? Іх няшмат:
- ВНУ мяне пераразмяркоўвае. Месцы там ёсць. Але адправіць мяне могуць толькі ў якую-небудзь вёску сістэмным адміністратарам;
- Я знаходжу што-небудзь сам да лютага. Я шукаў, але ўсе сумоўі былі ў кампаніях не ў РБ, туды пераразмеркавацца няможна.
- Я выплачваю кампенсацыю за тыя паўгода, што засталіся.
Часу засталося мала. Я гатовы на любыя прапановы (нават на 0,25 стаўкі), абы размеркавацца ў якую-небудзь ІТ-кампанію, але хутчэй за ўсё прыйдзецца выплачваць грошы.
Ад dev.by. Ці законна скарачаць спецыялістаў на размеркаванні?
У шэрагу выпадкаў так. Дапушчальныя падставы прапісаныя ў п. 34 Палажэння аб парадку размеркавання, пераразмеркавання, накіравання на працу, перанакіравання на працу, прадастаўлення месца працы выпускнікам, якія атрымалі навукова-арыентаваную, вышэйшую, сярэднюю спецыяльную або прафесійна-тэхнічную адукацыю.
Звярнуць увагу варта перш за ўсё на адсылкі да арт. 42 Працоўнага кодэкса (скасаванне працоўнай дамовы з ініцыятывы наймальніка). Там пералічаныя такія падставы:
- ліквідацыя арганізацыі;
- неадпаведнасць пасадзе праз стан здароўя;
- няяўка на працу на працягу 4+ месяцаў праз часовую непрацаздольнасць;
- невыкананне працоўных абавязкаў без уважлівых прычын пры нязнятым дысцыплінарным спагнанні;
- прагул;
- адсутнасць праз адміністрацыйны арышт;
- ужыванне на працы алкаголю, наркотыкаў.
І г. д.
Дарэчы, недастатковая кваліфікацыя для маладога спецыяліста НЕ можа быць падставай для звальнення.
Звальненне маладых спецыялістаў, маладых рабочых (служачых) або перавод іх на працу, не звязаную з атрыманай спецыяльнасцю і прысвоенай кваліфікацыяй, да заканчэння названага ў пасведчанні аб накіраванні на працу тэрміну абавязковай працы не дапускаецца, за выключэннем выпадкаў:
пераходу на выбарную пасаду служачага (пункт 4 часткі другой артыкула 35 Працоўнага кодэкса Рэспублікі Беларусь);
прыняцця рашэння ўстановай адукацыі аб пераразмеркаванні, перанакіраванні на працу маладога спецыяліста, маладога рабочага (служачага) альбо аб выдачы яму даведкі аб самастойным працаўладкаванні;
залічэння ва ўстанову адукацыі для атрымання адукацыі вышэйшага ўзроўню або для атрымання вышэйшай адукацыі іншага віду ў дзённай форме атрымання адукацыі;
парушэння наймальнікам заканадаўства аб працы, калектыўнай дамовы, пагаднення, працоўнай дамовы (кантракта), паступлення на ваенную службу па кантракце (артыкул 41 Працоўнага кодэкса Рэспублікі Беларусь);
звальнення праз падставы, прадугледжаныя ў пунктах 1–3, 5, 6, абзацах першым-пятым і сёмым-дзявятым пункта 7 артыкула 42, пунктах 1–3, 5–8 артыкула 44 і пунктах 2–7 і 10 часткі першай артыкула 47 Працоўнага кодэкса Рэспублікі Беларусь.
Звальненне маладых спецыялістаў, маладых рабочых (служачых), якія атрымалі вышэйшую, сярэднюю спецыяльную або прафесійна-тэхнічную адукацыю на ўмовах мэтавай падрыхтоўкі, да заканчэння ўстаноўленага дамовай аб мэтавай падрыхтоўцы спецыяліста (рабочага, служачага) тэрміну работы дапускаецца:
у выпадку скасавання дамовы аб мэтавай падрыхтоўцы спецыяліста (рабочага, служачага) праз падставы, пазначаныя ў пунктах 5 і 6 артыкула 78 Кодэкса Рэспублікі Беларусь аб адукацыі, паступлення на вайсковую службу па кантракце (артыкул 41 Працоўнага кодэкса Рэспублікі Беларусь);
праз падставы, прадугледжаныя ў пункце 6, абзацах першым-пятым і сёмым-дзявятым пункта 7 артыкула 42, пунктах 1, 5–8 артыкула 44 і пунктах 1–7 і 10 часткі першай артыкула 47 Працоўнага кодэкса Рэспублікі Беларусь.
Читать на dev.by