У Мінску міліцыя са стральбой затрымала мужчыну з нажом

12 ліпеня, Позірк. Міліцыя выкарыстала агнястрэльную зброю пры затрыманні мужчыны 12 ліпеня ў Мінску, паведамляе прэс-служба Міністэрства ўнутраных спраў.

Паводле інфармацыі ведамства, а 4 гадзіне раніцы жанчына паведаміла па нумары 102, што яе сын знаходзіцца ў двары шматкватэрнага дома ў мікрараёне Шабаны і “пагражае ўсіх зарэзаць”. Сястра мужчыны патэлефанавала ў хуткую дапамогу, каб паведаміць пра тое, што адбываецца.

Супрацоўнікі Заводскага РУУС заклікалі мужчыну супакоіцца і кінуць на зямлю “прадмет, падобны да нажа”. Мужчына праігнараваў патрабаванні сілавікоў, “працягнуў паводзіць сябе абуральна, пагражаючы зарэзаць сябе і навакольных, кінуўся на міліцыянера”.

Супрацоўнік міліцыі спачатку стрэліў у паветра, а затым — па нагах нападніка. Пасля гэтага мужчыне аказалі першую дапамогу і перадалі медыкам.

Як высветлілася пазней, 34-гадовы мужчына некалькі разоў прыцягваўся да крымінальнай адказнасці, у тым ліку за хуліганства, а таксама да адміністрацыйнай — за з’яўленне ў грамадскім месцы ў нецвярозым стане.

Міністэрства падкрэсліла, што “супрацоўнік АУС пры выкананні службовых абавязкаў з’яўляецца прадстаўніком улады і знаходзіцца пад абаронай дзяржавы”. Замах на яго ў любых формах “цягне спыненне такіх дзеянняў, у тым ліку з выкарыстаннем фізічнай сілы, спецсродкаў і зброі”.

Гэта не першы падобны выпадак за апошні час.

Напрыканцы чэрвеня ў Буда-Кашалёве (Гомельская вобласць) супрацоўнікі МУС з выкарыстаннем зброі затрымалі 62-гадовага мясцовага жыхара. Сцвярджалася, што мужчына “кідаўся з нажом на навакольных”. З раненнем у правую нагу затрыманага даставілі ў бальніцу.

У сярэдзіне красавіка міліцыянер страляў у 59-гадовага жыхара вёскі Малыя Бортнікі (Бабруйскі раён Магілёўскай вобласці), які пагражаў касой.

У студзені было два затрыманні са стральбой — у Клічаве (Магілёўская вобласць) і Гродне, напрыканцы мінулага года — яшчэ два, у Крупскім раёне Мінскай вобласці і Рагачоўскім раёне Гомельскай вобласці. У другім выпадку, які адбыўся 19 лістапада ў вёсцы Ліскі, міліцыянты стралялі ў мужчыну, які пагражаў паляўнічай стрэльбай, ён памёр у бальніцы.