Латушка: Рэжым Лукашэнкі спрабуе забіць беларускую культуру

29 кастрычніка, Позірк. “Пасля “Ночы расстраляных паэтаў” прайшло 86 гадоў. І сёння мы бачым, як злачынны рэжым Лукашэнкі таксама спрабуе забіць беларускую культуру, перапісвае падручнікі гісторыі, забараняе нацыянальныя сімвалы з тысячагадовай гісторыяй, выкараняе выкарыстанне нашай роднай беларускай мовы”, — заявіў кіраўнік Народнага антыкрызіснага ўпраўлення (НАУ) Павел Латушка ў звароце з нагоды гадавіны трагічнай падзеі.

Паводле яго слоў, “гісторыя цыклічная”.

“У зняволенні знаходзяцца больш за 140 дзеячаў культуры. На жаль, сёння сярод іх ёсць ахвяры, якія загінулі ў няволі. 86 гадоў таму ахвяры “Ночы расстраляных паэтаў” праходзілі па тых жа калідорах Пішчалаўскага замка”, — дадаў Латушка.

Ахвяраў тых падзей вярнуць немагчыма, як і тых, “каго забівалі начамі 2020-га і працягваюць забіваць”, сказаў палітык.

Дэмсілы, падкрэсліў кіраўнік НАУ, змагаюцца за тое, каб “крывавая ноч беларускай культуры і навукі больш не паўтарылася”.

Ноч на 30 кастрычніка 1937 года — адна са змрочных старонак у беларускай гісторыі ХХ стагоддзя. Тады НКУС расстраляў больш за 100 прадстаўнікоў беларускай інтэлектуальнай эліты: дзеячаў культуры, навукі, тагачасных чыноўнікаў.

Сярод іх былі 22 літаратары, у тым ліку — Міхась Чарот, Алесь Дудар, Міхась Зарэцкі, Платон Галавач, Тодар Кляшторны, Юрка Лявонны, Валерый Маракоў, Майсей Кульбак, Ізі Харык, Васіль Сташэўскі, Янка Нёманскі, Зяма Півавараў, Васіль Коваль, Макар Шалай, Арон Юдэльсан і інш.

Забойствы праводзіліся ва ўнутранай турме НКУС (цяпер СІЗА КДБ, так званая “амерыканка”) і падвалах Пішчалаўскага замка (цяпер СІЗА № 1, “валадарка”).

З 1988 года беларусы ў розных гарадах свету праводзяць акцыі ўшаноўвання расстраляных. У Беларусі мерапрыемствы традыцыйна праходзілі ва ўрочышчы Курапаты пад Мінскам, дзе пахаваны шматлікія ахвяры сталінскіх рэпрэсій. Апошні такі сход адбыўся ў 2020 годзе.

У 2023 годзе акцыі памяці праходзяць больш як у 20 гарадах 11 краін.