За хабар затрыманы адзін з кіраўнікоў БЧ, у яго знойдзена больш за 3 млн долараў — МУС

13 чэрвеня, Позірк. Аб затрыманні за хабар аднаго з кіраўнікоў Беларускай чыгункі паведаміла 13 чэрвеня Міністэрства ўнутраных спраў.

Паводле інфармацыі ведамства, супрацоўнікамі ГУБАЗіК выкрыта карупцыйная схема, якую “стварыў і курыраваў адзін з кіраўнікоў БЧ”.

Хабары за лабіраванне інтарэсаў камерцыйных структур, сцвярджае МУС, насілі сістэмны характар.

“Устаноўлена, што службовая асоба толькі ў выніку некалькіх сустрэч атрымала <…> у выглядзе хабару больш за 300 тыс. долараў”, — паведамляецца ў відэароліку, размешчаным на ютуб-канале ведамства.

Падчас вобыскаў у загарадным доме фігуранта было знойдзена больш за 3 млн долараў.

Следчым камітэтам адкрыта крымінальную вытворчасць паводле ч. 3 арт. 430 КК (атрыманне хабару ў асабліва буйным памеры), які прадугледжвае пакаранне да 15 гадоў пазбаўлення волі са штрафам і з пазбаўленнем права займаць пэўныя пасады або займацца пэўнай дзейнасцю.

3 чэрвеня нефармальная “Супольнасць чыгуначнікаў Беларусі” са спасылкай на свае крыніцы паведамляла пра затрыманне за карупцыю намесніка начальніка БЧ Пятра Дулуба.