СМІ павінны мець цвёрдую патрыятычную пазіцыю — Лукашэнка

5 траўня, Позірк. Друкаванае слова з’яўляецца “аўтарытэтным дарадцам і суразмоўцам”, фарміруе “кругагляд і мысленне чалавека ў велізарным багацці інфармацыі”, гаворыцца ў віншаванні Аляксандра Лукашэнкі 5 траўня з нагоды Дня друку.

Тэкст віншавання апублікаваны на сайце Лукашэнкі.

Назваўшы працу журналістаў “люстэркам нашага жыцця”, ён адзначыў, што іх праца дазваляе”ў інфармацыйнай разнастайнасці разглядзець і зразумець сутнасць таго, што адбываецца”. “Гэта патрабуе ад прэсы якаснага аналізу падзей, аператыўнасці, дакладнасці ацэнак, а таксама цвёрдай патрыятычнай пазіцыі”, — заявіў віншавальнік.

На яго думку, у эпоху “высокіх тэхналогій і постпраўды” СМІ “адным сваім словам, пранікаючы ў розумы, сэрцы і душы мільёнаў людзей, здольныя парадаваць або засмуціць, усяліць надзею і ўпэўненасць, папярэдзіць аб небяспецы”.

Ён пажадаў, каб “кожны напісаны радок спрыяў развіццю беларускага грамадства” і дапамагаў “супрацьстаяць выклікам новага часу”.

8 красавіка пры прызначэнні Уладзіміра Пярцова намеснікам кіраўніка сваёй адміністрацыі Лукашэнка заявіў, што “ідэалагічная праца сёння выходзіць на першы план”. “Трэба падцягнуць, прывесці ў парадак усе СМІ”, — сказаў ён.

Паводле яго слоў, сёння “ў гэты складаны перыяд” актуальныя пытанні прапаганды і контрпрапаганды: “Усё сышлося цяпер на СМІ. Ідзе інфармацыйная вайна”.

Праца недзяржаўных грамадска-палітычных медыя ў Беларусі сёння фактычна забароненая. За кратамі знаходзіцца 35 незалежных журналістаў.