Мінфін Польшчы: Абмежаванні на ўвоз у Беларусь аўтамабіляў уведзеныя для выкаранення абыходу санкцый

11 красавіка, Позірк. Абмежаванні на ўвоз у Беларусь аўтамабіляў з аб’ёмам рухавіка больш за 1,9 літра ўведзеныя як “эфектыўная мера па выкараненні практыкі абыходу санкцый”, паведаміла Міністэрства фінансаў Польшчы Deutsche Welle (DW).

Адзначаецца, што фінансавае ведамства разглядае Беларусь як “краіну высокай рызыкі”, вядомай дапамогай у абыходзе антырасійскіх санкцый.

Мінфін спаслаўся на рэгламент Савета Еўрасаюза ад 2014 года, які забараняе “свядомы і наўмысны ўдзел у дзейнасці” па абыходзе санкцыйных абмежаванняў. Неабходнасць прадастаўляць на мяжы даведку ад вытворцы аўтамабіля ў ведамстве тлумачаць “патрабаваннямі мытнага кодэкса”.

Разам з тым Мінфін не патлумачыў, чаму забарона распаўсюджваецца менавіта на аўтамабілі з аб’ёмам рухавіка больш за 1,9 літра.

У канцы сакавіка Польшча, Латвія і Літва перасталі пускаць у Беларусь аўтамабілі на транзітных нумарах з аб’ёмам рухавіка больш за 1,9 літра коштам звыш 50 тыс. еўра.

Афіцыйна пра новыя абмежаванні не паведамлялася.