4 красавіка, Позірк. Былы дырэктар тэлеканала “Белсат” Агнешка Рамашэўска-Гузы 3 красавіка звярнулася ў суд з іскам у дачыненні да польскага тэлевяшчання TVP (“Белсат” уваходзіць у яго структуру).
“Не павінна быць так, што пасля 32 гадоў працы чалавека выкідваюць, як смецце”, — напісала яна на сваёй старонцы ў “Фэйсбуку”.
Рамашэўска-Гузы заявіла, што “напрыканцы прафесійнай кар’еры” ў яе “адабралі праект, які быў большы за працу”, яна прысвяціла яму 18 гадоў свайго жыцця. Пры гэтым, паводле яе слоў, дзеля “Белсата” прыйшлося адмовіцца “практычна ад усяго: асабістага жыцця, забаў, падтрымання сацыяльных сувязей”.
На яе думку, у “зладжаную, добрую, прафесійную каманду, якая стваралася на працягу многіх гадоў з вялізнымі намаганнямі, убіваецца клін, руйнуецца яе салідарнасць, сяброўскія стасункі”, і так быць не павінна. “У нармальнай краіне такое не павінна схадзіць з рук”, — напісала Рамашэўска-Гузы.
Былы дырэктар “Белсату” адзначыла, што будзе ўдзячная за матэрыяльную дапамогу на судовыя выдаткі. Усе грошы, якія атрымаецца сабраць звыш неабходнага для справы, Рамашэўска-Гузы плануе перадаць у фонд “Зона салідарнасці”, які падтрымлівае асобныя праекты тэлеканала.
12 сакавіка Рамашэўска-Гузы, якая кіравала “Белсатам” з 2007 года, паведаміла пра сваё звальненне. У той жа дзень стала вядома, што дырэктарам тэлеканала стане Аляксей Дзікавіцкі, які да гэтага займаў пасаду намесніка дырэктара.
18 сакавіка медыяменеджар заявіла, што яе звольнілі на падставе дысцыплінарнага спагнання. Яна лічыць, што “гэта была помста” за пазіцыю, якая не дазволіла яе “ні купіць, ні заткнуць рот”.
Прэс-служба польскага тэлебачання ўдакладніла, што змены сталі “вынікам працы над новай мадэллю для замежных каналаў TVP”, што фінансуюцца польскім Міністэрствам замежных спраў.
