Кавалеўскі: Беларусь адновіць у ААН статус адказнай, перадавой дзяржавы

24 кастрычніка, Позірк. Беларусь “абавязкова адновіць у Арганізацыі Аб’яднаных Нацый статус адказнай, перадавой дзяржавы”, але толькі тады, калі ўлада ў краіне “вернецца народу”, заявіў намеснік кіраўніцы Аб’яднанага пераходнага кабінета (АПК), прадстаўнік АПК па міжнародных справах Валер Кавалеўскі ў Міжнародны дзень ААН (24 кастрычніка).

Паводле яго слоў, дэмакратычным сілам важна працаваць з ААН, бо Беларусь пражывае “падвойны крызіс: унутрыпалітычны — з масавымі рэпрэсіямі, калапсам інстытутаў кіравання”, а таксама “знешнепалітычны, звязаны з пагрозай незалежнасці і нацыянальнай ідэнтычнасці”.

Сёння Беларусі найбольш увагі надае Офіс вярхоўнага камісара ААН па правах чалавека, канстатаваў Кавалеўскі. Разам з тым, адзначыў ён, дэмсілы “неаднаразова казалі” пра неабходнасць задзейнічаць для вырашэння крызіса ў Беларусі патэнцыял іншых структур арганізацыі — ЮНІСЕФ, ЮНЕСКО, МАГАТЭ, СААЗ, Міжнароднай арганізацыі па міграцыі, Упраўлення вярхоўнага камісара па ўцекачах.

Паводле слоў Кавалеўскага, Беларусь, якая стала краінай-заснавальніцай ААН у 1945 годзе і да 1991-га “трымалася лініі Крамля”, пакуль “належнае месца” ў арганізацыі “не заняла”.

Дзякуючы ўдзелу дэлегацыі беларускіх дэмсіл на чале са Святланай Ціханоўскай у мерапрыемствах высокага ўзроўню падчас сесій Генасамблеі ААН у 2022 і 2023 гадах, заявіў прадстаўнік АПК, міжнародная супольнасць дазналася пра крызіс у Беларусі і яго “наступствы для глабальных інтарэсаў”.

Сталая праца з ААН, на яго думку, “дазваляе захоўваць кансалідаваную пазіцыю міжнароднай супольнасці па непрызнанні Лукашэнкі”.

Дзень Арганізацыі Аб’яднаных Нацый адзначаецца з 1948 года. Прымеркаваны да дня, калі набыў моц статут ААН — 24 кастрычніка 1945-га.