Ціханоўская і Шыманітэ абмеркавалі змякчэнне ўмоваў легалізацыі для беларусаў у Літве

23 кастрычніка, Позірк. Змякчэнне ўмоваў легалізацыі для беларусаў у Літве, працяг тэрміну дзеянняў відаў на жыхарства з аднаго да трох гадоў, пашырэнне практыкі выдачы пашпартоў замежніка абмеркавалі Святлана Ціханоўская і прэм’ер-міністр Літвы Інгрыда Шыманітэ. Пра гэта паведаміў “Позірку” галоўны дарадца беларускага палітыка Франак Вячорка.

Паводле яго слоў, Шыманітэ выказала падтрымку дэмакратычнай Беларусі і запэўніла, што Літва працягне яе на міжнароднай арэне.

Патрабаванне Літвы да рэжыму Лукашэнкі застаецца нязменным: вызваліць і рэабілітаваць усіх палітычных вязняў, правесці свабодныя выбары. Літва працягне пашырэнне санкцый супраць рэжыму Лукашэнкі за саўдзел у вайне супраць Украіны і рэпрэсіі супраць беларусаў, заявіла прэм’ер-міністр.

Ціханоўская і Шыманітэ абмеркавалі недапушчальнасць змякчэння санкцыяў супраць вытворцы калійных угнаенняў “Беларуськалій” (Салігорск, Мінская вобласць), а таксама іншых дзяржаўных прадпрыемстваў, якія “падтрымліваюць рэпрэсіўны рэжым дыктатара Лукашэнкі”.

Ціханоўская папрасіла Шыманітэ падтрымаць гімназію імя Скарыны ў Вільнюсе і беларускія ініцыятывы ў Літве.