18 сакавіка, Позірк. Вярхоўны суд 18 сакавіка прызнаў Уладзіміра Катрука (1921–2015) вінаватым паводле арт. 127 Крымінальнага кодэкса (генацыд) без прызначэння пакарання, паведамляе прэс-служба ВС.
Судовае разбіральніцтва пачалося 8 лютага. У крымінальнай справе Катрука, паводле сцвярджэння беларускіх уладаў, 35 тамоў.
Згодна з інфармацыяй МЗС, улады Канады не адрэагавалі на запыт Беларусі аб выдачы Катрука.
Катрук нарадзіўся ў Паўночнай Букавіне на тэрыторыі Каралеўства Румынія (цяпер Чарнавіцкая вобласць Украіны). Яго імя называецца ў ліку тых, хто мае дачыненне да спалення беларускай вёскі Хатынь у 1943 годзе. У той час ён служыў у 118-м батальёне шуцманшафту.
Пасля Другой сусветнай вайны выехаў у Канаду, прыняў грамадзянства гэтай краіны. На год смерці лічыўся другім у спісе тых нацысцкіх ваенных злачынцаў, якія заставаліся ў жывых і адшукваюцца амерыканскім Цэнтрам Сымона Візенталя. Катрук адмаўляў удзел у ваенных злачынствах падчас Другой сусветнай вайны.
17 ліпеня 2023 года Аляксандр Лукашэнка падпісаў закон “Аб змене Крымінальна-працэсуальнага кодэкса”, які дазваляе пераследваць памерлых у крымінальным парадку.
