Лукашэнка загадаў шукаць рынкі для беларускіх карысных выкапняў

12 сакавіка, Позірк. “Усе кажуць — санкцыі. Для вас санкцый няма. Шукайце іншыя рынкі”, — заявіў чыноўнікам Аляксандр Лукашэнка 12 сакавіка ў Мінску на нарадзе аб стане і развіцці мінеральна-сыравіннай базы.

Паводле слоў Лукашэнкі, якія прыводзіць яго прэс-служба, уласныя мінеральна-сыравінныя рэсурсы маюць “асаблівае значэнне”, бо яны з’яўляюцца “залогам суверэнітэту і стабільнага развіцця эканомікі”. Гэта актуальна цяпер, калі “ў дачыненні да Беларусі з кожным годам узмацняецца санкцыйны ціск”, падкрэсліў ён.

Пры гэтым Лукашэнка прывёў шэраг прыкладаў нерацыянальнага, на яго думку, выкарыстання карысных выкапняў. Раней, паводле яго слоў, белую гліну — каалін — для айчыннай пліткі імпартавалі з Украіны. Цяпер гэтая сыравіна закупляецца ў Расіі, хаця ў Беларусі маюцца свае радовішчы — у Лунінецкім і Столінскім раёнах (Брэсцкая вобласць).

Шкляная прамысловасць, заявіў Лукашэнка, не цалкам забяспечаная кварцавым пяском, хоць аб’ём разведаных запасаў “мог бы вырашыць гэтую праблему адразу на два гады”.

“Няпоўная загрузка вытворчасцей і зніжэнне аб’ёмаў выпускаемай прадукцыі, што загадзя цягне ўніз іншыя паказчыкі”, — абмаляваў ён сваё бачанне праблемы.

У 2023 годзе, паводле слоў Лукашэнкі, прадпрыемствы Міністэрства архітэктуры і будаўніцтва “на чвэрць знізілі экспарт шчэбню”, Міністэрства энергетыкі “амаль у два разы менш паставіла за мяжу тарфяной прадукцыі”.

Ён таксама звярнуў увагу на недахопы ў працы Навукова-вытворчага цэнтра па геалогіі, які займаецца разведкай для ўсіх напрамкаў: “Камітэт дзяржаўнага кантролю інфармуе, што тэхналагічныя вытворчыя фонды там зношаныя на 90%”.

Разам з тым Лукашэнка падвергнуў ацэнку камітэта сумневу, спытаўшы, “чаму менавіта 90%, а не 88%”. “У 2022 годзе мной прынятае рашэнне аб умацаванні гэтай матэрыяльна-тэхнічнай базы. За два гады закуплена 21 адзінка найсучаснейшай тэхнікі і абсталявання. Вынік?” — звярнуўся ён да чыноўнікаў.

Прыкладам паспяховай працы Лукашэнка назваў здабычу калію, адзначыўшы, што “Беларуськалій” стаў сусветным брэндам: “Тут ёсць уласная выдатна адладжаная сістэма — ад разведкі новых радовішчаў да вытворчасці ўгнаенняў”.

“Беларуськалій” знаходзіцца пад санкцыямі ЕС з 2022 года. Праз іх уплыў нарвежскі пастаўшчык калію Yara — адзін з найбуйнейшых у Еўропе пакупнікоў беларускіх угнаенняў — абвясціў пра спыненне супрацы з “Беларуськаліем”.

1 лютага 2022 года спыніўся экспарт калійных угнаенняў праз літоўскі порт у Клайпедзе.

Савет Еўрапейскага саюза сёлета 26 лютага прыняў рашэнне падоўжыць на год, да 28 лютага 2025-га, “дзеянне абмежавальных мер, звязаных з унутранымі рэпрэсіямі ў Беларусі і падтрымкай рэжымам [Лукашэнкі] вайны Расіі супраць Украіны”.

Цяпер у спісе абмежавальных мер ЕС 233 фізічныя асобы, уключаючы Лукашэнку, і 37 юрыдычных асоб.

Санкцыі ўвялі ЗША, Канада, Вялікабрытанія ды інш. Так ці інакш усе абмежавальныя меры ў дачыненні да Беларусі звязаныя з дзеяннямі і палітыкай Лукашэнкі.