BelPol атрымаў доступ да публічных экранаў у Мінску для трансляцыі звароту Ціханоўскай
Адзін з экранаў, на якім трансляваўся зварот Святланы Ціханоўскай
24 лютага, Позірк. Аб’яднанне супрацоўнікаў сілавых структур BelPol, якія перайшлі на бок народа, атрымала доступ да сістэмы публічных экранаў у Мінску для трансляцыі звароту Святланы Ціханоўскай з нагоды правядзення 25 лютага парламенцкіх выбараў і выбараў у мясцовыя саветы. Такая выснова вынікае з паведамленняў прэс-службаў дэмакратычнага лідара і BelPol.
Паводле інфармацыі офіса Ціханоўскай, відэазварот мог быць паказаны больш чым на 2 тыс. экранаў у гандлёвых цэнтрах, буйных крамах, на станцыях метрапалітэна.
У сацыяльных сетках ужо размешчаныя фатаграфіі з выявай экранаў, на якіх транслюецца выступ.
У звароце, які доўжыцца каля 50 секунд, Ціханоўская выказала ўпэўненасць, што беларусы не забыліся, як сказалі “не” вайне і дыктатуры. “Сёння мы гаворым “не” фальшывым выбарам. Мы ўмеем змагацца. Мы ўмеем аб’ядноўвацца. Мы ўмеем перамагаць. Мы не спынімся, пакуль усе не будуць вольныя. Перамены ў Беларусі — задача кожнага з нас”, — заявіла дэмлідар.
