Мінпрамы Беларусі і Расіі маюць намер супрацоўнічаць у мікраэлектроніцы, вытворчасці станкоў і ліфтаў
20 лютага, Позірк. Міністр прамысловасці Беларусі Аляксандр Рагожнік і першы намеснік міністра прамысловасці і гандлю Расіі Васіль Асьмакоў падпісалі 19 лютага ў Мінску план мерапрыемстваў на 2024–2026 гады па рэалізацыі пагаднення паміж урадамі дзвюх краін аб адзінай прамысловай палітыцы, паведамляе прэс-служба беларускага Мінпрама.
Дакумент прадугледжвае прыняцце неабходных нацыянальных і двухбаковых нарматыўных прававых актаў, а таксама актаў Саюзнай дзяржавы.
Сярод напрамкаў узаемадзеяння — рэалізацыя дарожных карт па супрацоўніцтве ў сферах мікраэлектронікі і станкабудавання, “узгадненне сумеснай работы па развіццю сельскагаспадарчага і аўтамабільнага машынабудавання, развіццё супрацоўніцтва ў сферы ліфтабудавання і спецыялізаванага машынабудавання, у тым ліку, па вытворчасці і пастаўцы тэхнікі для абслугоўвання аэрапортаў”.
Бакі дамовіліся праводзіць узгодненую палітыку ў рэалізацыі інвестыцыйных і кааперацыйных праектаў з прыярытэтным прыцягненнем да іх рэалізацыі прадпрыемстваў Саюзнай дзяржавы “з улікам кампетэнцый, якія існуюць”.
Прадугледжваецца рэалізацыя імпартазамяшчальных інвестыцыйных і кааперацыйных праектаў. План таксама ўключае рэалізацыю дамоўленасцей аб прызнанні тэхналагічных аперацый на тэрыторыі Саюзнай дзяржавы.
Акрамя таго, профільныя ведамствы замацавалі ў дакуменце магчымасць прадастаўлення ўзаемнага недыскрымінацыйнага ўдзелу ў праграмах субсідзіравання, ільготнага лізінгу, а таксама ў закупках за кошт уласных сродкаў.
Беларусь і Расія, нагадвае Мінпрам, у 2022–2023 гадах падпісалі пагадненні аб адзінай прамысловай палітыцы, аб прызнанні тэхналагічных аперацый на тэрыторыі Саюзнай дзяржавы, аб развіцці мікраэлектронных тэхналогій, праектавання і вытворчасці электроннай кампанентнай базы і электроннага машынабудавання і аб развіцці станкаінструментальнай прамысловасці.
