13 лютага, Позірк. Былы палітвязень Сяргей Пятрухін эвакуяваны з Беларусі, паведаміў 13 лютага ў сваім тэлеграм-канале сузаснавальнік фонду салідарнасці BySol праваабаронца Андрэй Стрыжак.
“Гэтая эвакуацыя была складанай, доўгай і напружанай, але я шчаслівы паведаміць, што ўсё атрымалася!” — напісаў Стрыжак.
Аўтары ютуб-каналаў “Народны рэпарцёр” жыхары Брэста Сяргей Пятрухін і Аляксандр Кабанаў былі затрыманыя ў чэрвені 2020 года. Фармальныя прычыны затрымання былі розныя, аднак пасля іх абодвух звязалі з падзеямі 29 траўня ў Гродна, калі быў затрыманы Сяргей Ціханоўскі і прадстаўнікі яго каманды.
14 красавіка 2021 года суд Кастрычніцкага раёна Магілёва прызнаў блогераў вінаватымі паводле арт. 342 (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх) і арт. 369 (абраза прадстаўніка ўлады) Крымінальнага кодэкса. Пятрухіна дадаткова прызналі вінаватым паводле арт. 391 (абраза суддзі). Іх прыгаварылі да 3 гадоў калоніі агульнага рэжыму.
Пятрухін адбываў пакаранне ў віцебскай калоніі № 3. Кабанаў першапачаткова быў у наваполацкай калоніі № 1 (Віцебская вобласць), але пазней яму зрабілі больш жорсткім рэжым. На волю ён выйшаў з магілёўскай турмы № 4.
Блогеры выйшлі на волю 17 снежня 2022 года. Неўзабаве пасля гэтага Кабанаў пакінуў Беларусь, цяпер ён працуе ў аб’яднанні былы сілавікоў BelPol.
