Латушка: Прэзідэнт Польшчы будзе акцэнтаваць пытанне Беларусі падчас сустрэч на міжнародным узроўні

25 студзеня, Позірк. Далейшую падтрымку вольнай Беларусі з боку прэзідэнта Польшчы Анджэя Дуды, у тым ліку на сустрэчах на міжнародным узроўні, абмяркавалі ў Варшаве дзяржсакратар, кіраўнік Бюро міжнароднай палітыкі Канцылярыі прэзідэнта Польшчы Мешка Паўляк з намеснікам кіраўніцы Аб’яднанага пераходнага кабінета (АПК), кіраўніком Народнага антыкрызіснага ўпраўлення (НАУ) Паўлам Латушкам. 

Аб гэтым паведамляе прэс-служба беларускага палітыка.

“Гэта [падтрымка] ёсць і гэта будзе заўсёды”, — заявіў кіраўнік Бюро міжнароднай палітыкі канцылярыі Дуды.

Паўляк “пагадзіўся з тэзісам, што дэмакратычныя, незалежная і еўрапейская Беларусь адпавядае агульным нацыянальным інтарэсам беларускага грамадства і Польшчы”.

Латушка акцэнтаваў увагу на сітуацыі з палітычнымі рэпрэсіямі супраць грамадзянскага насельніцтва ў Беларусі, якія “зноў маштабаваліся ў апошнія дні”. 

“Узбуджэнне крымінальных спраў у дачыненні да 20 вядомых беларускіх палітыкаў, журналістаў і незалежных аналітыкаў мае на мэце абмежаваць магчымасці беларусаў і міжнароднай супольнасці ў доступе да праўдзівай інфармацыі аб сітуацыі ў Беларусі”, — адзначыў ён.

Латушка адзначыў “важнасць адказнасці [Аляксандра] Лукашэнкі і прадстаўнікоў яго рэжыму за ваенныя злачынствы і злачынствы супраць чалавечнасці ў дачыненні да беларусаў”.

Кіраўнік НАУ праінфармаваў польскі бок аб электаральнай кампаніі ў Беларусі, адзначыўшы, што яна “не можа быць прызнана выбарамі”.

Польскаму боку “прадастаўлена інфармацыя аб інкарпарацыі баевікоў ПВК “Вагнер” у структуры ўнутраных войскаў МУС Лукашэнкі”.

Бакі “абмеркавалі неабходнасць супрацьдзеяння пагрозам суверэнітэту і незалежнасці Беларусі, якія сыходзяць ад так званай Саюзнай дзяржавы Беларусі і Расіі”.

Асобна абмеркаваная тэматыка палітзняволеных, у тым ліку ў кантэксце рэпрэсій у дачыненні да блізкіх палітзняволеных і былых палітзняволеных.