Беларускі Чырвоны Крыж прыпыніў грашовую падтрымку бежанцаў і вымушаных мігрантаў

12 студзеня, Позірк. Беларускі Чырвоны Крыж (БЧК) 12 студзеня паведаміў аб прыпыненні грашовай падтрымкі (выдачы ваўчараў, кампенсацыі затрат на медыцынскія паслугі, выплат для арганізацыі дзіцячага летняга вольнага часу) замежным грамадзянам — бежанцам і асобам, якія шукаюць прыстанішча, вымушаным мігрантам і асобам без грамадзянства.

Паводле сцвярджэння БЧК, гэта звязана са спыненнем супрацоўніцтва з партнёрамі, якія курыравалі ў Беларусі праектную дзейнасць, накіраваную на падтрымку згаданых катэгорый асоб. Разам з тым, адзначылі ў БЧК, ім будзе па-ранейшаму аказвацца гуманітарная дапамога (сродкі гігіены, адзенне, абутак і інш.).

5 студзеня расследвальніцкі цэнтр “Бюро Медыя” апублікаваў даныя, з якіх вынікае, што БЧК пазбавіцца фінансавання ў памеры 4,42 млн рублёў у выніку прыпынення з 1 снежня 2023 года членства ў Міжнароднай федэрацыі таварыстваў Чырвонага Крыжа і Чырвонага Паўмесяца (МФТЧКіЧП).

Гэта адбылося з прычыны невыканання БЧК кастрычніцкага патрабавання федэрацыі вызваліць ад пасады генеральнага сакратара Дзмітрыя Шаўцова, які абвінавачваецца ў датычнасці да вывазу дзяцей з акупаваных тэрыторый Украіны, а таксама рэзананснымі заявамі аб размешчанай у Беларусі расійскай ядзернай зброі.

“Адхіленне азначае, што БЧК губляе свае правы члена МФТЧКіЧП. Любое новае фінансаванне ў дачыненні да Беларускага Чырвонага Крыжа таксама будзе прыпынена, — паведаміла міжнародная федэрацыя. — Акрамя таго, БЧК не зможа ўдзельнічаць у Генасамблеі МФТЧКіЧП, а таксама галасаваць або быць абраным на якіх-небудзь статутных сходах МФТЧКіЧП”.

БЧК можа быць адноўлены ў правах, як толькі “выканае рашэнне праўлення” і адхіліць дзейнага генеральнага сакратара ад пасады.

Прэтэнзіі да генеральнага сакратара арганізацыі ўзніклі з-за яго візітаў у акупаваныя РФ украінскія гарады Луганск і Данецк, заявы аб перамяшчэнні ўкраінскіх дзяцей з акупаваных тэрыторый і інш.

Беларускі бок не адмаўляе факту вывазу ўкраінскіх дзяцей з акупаваных тэрыторый, заяўляючы, што гэта робіцца для іх аздараўлення і са згоды іх законных прадстаўнікоў.

5 снежня 2023 года Шаўцоў заявіў, што МФТЧКіЧП “ніколі не надавала фінансавую дапамогу ў праектах [БЧК], накіраваных на грамадзян Рэспублікі Беларусь”.

“Гэта выключна грашовыя сродкі для дапамогі мігрантам, прычым толькі з Украіны. Яны нават не дапамагаюць мігрантам, якія прыбываюць з Блізкага Усходу. Таму, канешне, мы працягнем дапамагаць, у тым ліку і мігрантам, якія прыбываюць з Украіны, з іншых краін. Можа быць, не ў такім аб’ёме, як раней”, — адзначыў Шаўцоў.