11 студзеня, “Позірк”. Перад Дэпартаментам дзяржаўнай бяспекі (ДДБ) Літвы пастаўлена “нерэальная задача” правяраць кожнага грамадзяніна Беларусі, які ўязджае ў краіну з мэтай застацца там на пастаяннае месца жыхарства, заявіў 11 студзеня міністр замежных спраў Габрыэлюс Ландсбергіс.
“У сувязі з гэтым мы павінны падумаць, што мы можам зрабіць, як можна змякчыць пагрозы і як можна мінімізаваць ціск на ўстанову, каб яна выконвала задачу, якую, магчыма, не можа выканаць у поўнай меры”, — цытуе Ландсбергіса delfi.
Ён дадаў, што, паводле ацэнкі ведамства, паток іншаземцаў, якія перасякаюць літоўскую граніцу, “не абавязкова сумяшчальны з інтарэсамі нацыянальнай бяспекі”. Пры гэтым “існуюць розныя спосабы вырашэння гэтага пытання, і гэтым будуць займацца адказныя міністэрствы”.
4 снежня 2023 года старшыня парламенцкага Камітэта па нацыянальнай бяспецы і абароне (КНБА) Лаўрынас Кашчунас зарэгістраваў у сейме разам з калегам Аўдронюсам Ажубалісам, а таксама намеснікам старшыні парламента Паўлюсам Саўдаргасам унёс на разгляд парламента папраўкі да дзейнага заканадаўства, якія прапануюць абмежаванне выдачы пасведчання на жыхарства беларусам (за выключэннем высокакваліфікаваных работнікаў), але адначасова аблягчаюць умовы для атрымання нацыянальнай візы па гуманітарных меркаваннях. 8 студзеня 2024 года Кашчунас заявіў, што ў сейме Літвы не хапае галасоў, каб уніфікаваць нацыянальныя санкцыі для грамадзян Беларусі з тымі абмежаваннямі, якія дзейнічаюць у дачыненні да расіян.
У канцы 2023 года сейм ухваліў, а прэзідэнт Гітанас Наўседа падпісаў папраўкі да закона аб прававым статусе замежнікаў, якія сярод іншага дазваляюць выдаваць беларусам, якія прыбылі краіну пры пасярэдніцтве МЗС, від на жыхарства па гуманітарных прычынах не на адзін, а на тры гады. КНБА выступаў супраць гэтай прапановы.
Закон аб абмежавальных мерах, звязаны з парадкам уезду і легалізацыі ў Літве, набыцці нерухомасці і іншымі пытаннямі, быў прыняты ў красавіку 2023 года. На этапе разгляду дакумент быў значна больш мяккім у дачыненні да беларусаў, большасць санкцый закранула расіян.
Наўседа наклаў на закон вета і прапанаваў парламенту зраўнаваць санкцыі для беларусаў і расіян. Сойм адхіліў вета і зацвердзіў дакумент без прапановаў кіраўніка дзяржавы. Палітык сваю пазіцыю не змяніў, але на восеньскую сесію парламента пытанне аб уніфікацыі абмежавальных мер не вынесла.
