Кіраўнік Мінсельгасхарча паабяцаў “накарміць людзей у Экватарыяльнай Гвінеі”

10 снежня, Позірк. Беларусь дапаможа накарміць людзей у Экватарыяльнай Гвінеі, заявіў міністр сельскай гаспадаркі і харчавання Сяргей Барташ на фоне візіту ў гэтую афрыканскую краіну Аляксандра Лукашэнкі.

Паводле слоў кіраўніка Мінсельгасхарча, якога цытуе прэс-служба ведамства, беларускія спецыялісты маюць намер “сур’ёзна падключыцца да развіцця і фактычна стварэння сучаснага аграрнага сектара ў Экватарыяльнай Гвінеі”.

“Некаторы час таму”, дадаў чыноўнік, пачата “вывучэнне глебаў як на астравах, так і на мацерыковай частцы краіны”. “Гэта неабходна, каб вызначыць іх склад, і на падставе атрыманых дадзеных падабраць аптымальны набор сельгаскультур для вырошчвання, запатрабаваныя мінеральныя ўгнаенні”, — сказаў Барташ.

“Дамовіліся ў першым паўгоддзі наступнага года стварыць тут лабараторыю і навучыць іх спецыялістаў тэхналогіі вызначэння глебавага складу. Атрыманыя вынікі вельмі абнадзейваюць”, — адзначыў міністр.

Пасля перамоваў з прэзідэнтам Тэадора Абіангам Нгемай Мбасога 9 снежня Аляксандр Лукашэнка заявіў пра 74 сумесныя праекты, якія Экватарыяльная Гвінея і Беларусь рэалізуюць “у найбліжэйшыя 2–3 гады”.

“Беларусь мае вопыт механізацыі і індустрыялізацыі сельскай гаспадаркі, наша тэхніка, тэхналогіі простыя і надзейныя. Мы выпускаем шырокі спектр машын і абсталявання для іншых галін эканомікі. Упэўнены, што наша грузавая, аўтобусная, дарожна-будаўнічая, камунальная, пажарная, кар’ерная, лесанарыхтоўчая тэхніка будзе запатрабаванай пры рэалізацыі пастаўленых кіраўніцтвам Экватарыяльнай Гвінеі задач па паляпшэнні сацыяльна-эканамічных паказчыкаў і павышэнні ўзроўню жыцця насельніцтва”, — сказаў Лукашэнка.

6–7 верасня Мбасога здзейсніў візіт у Беларусь — першую еўрапейскую краіну, якую ён наведаў на пасадзе кіраўніка дзяржавы. Лукашэнка заявіў тады пра гатоўнасць дапамагчы Экватарыяльнай Гвінеі “абараніць сябе”.

19 кастрычніка Лукашэнка сустрэўся з міністрам замежных спраў гэтай дзяржавы. 15 лістапада прэзідэнт Экватарыяльнай Гвінеі прыняў Алейніка, які прыбыў на перамовы з міністрам сельскай гаспадаркі і харчавання Сяргеем Барташам і міністрам аховы здароўя Дзмітрыем Піневічам.