СК: У якасці падазраваных па новай “справе Каардынацыйнай рады” прыцягнута больш за 100 чалавек

28 лістапада, Позірк. У якасці падазраваных па новай “справе Каардынацыйнай рады” (КР) прыцягнута больш за 100 чалавек, паведаміла прэс-служба Следчага камітэта (СК). Ім інкрымінуюцца ч. 1 арт. 357 (змова ці іншыя дзеянні з мэтай захопу дзяржаўнай улады) і ч. 3 арт. 361¹ (стварэнне экстрэмісцкага фармавання альбо ўдзел у ім) Крымінальнага кодэкса.

У відэакаментары афіцыйны прадстаўнік СК Сяргей Кабаковіч заявіў, што адзін з членаў КР “вырашыў скарыстацца правам вярнуцца на радзіму праз створаную для гэтага камісію”. Ён падаў сілавікам “пашыраны спіс збеглых злачынцаў з Каардынацыйнай рады, у якім фігуруе звыш сотні асоб, у тым ліку раней невядомых праваахоўным органам здраднікаў”.

Паводля сцвярджэння спікера СК, пасля эміграцыі з Беларусі члены КР “стварылі за мяжой пародыю дзяржаўнай сістэмы з мэтай публічнай імітацыі так званага транзіту ўлады”, але на самой справе — “фінансавую піраміду для спансавання экстрэмісцкай дзейнасці і канцэнтрацыі грашовых патокаў калектыўнага Захаду для далейшай іх растраты на асабістыя патрэбы”.

Гэтыя асобы прызнаныя падазраванымі. Цяпер сумесна з МУС СК праводзіць”следчыя дзеянні і аператыўна-вышуковыя мерапрыемствы, у тым ліку ператрусы, накіраваныя на збор доказаў злачыннай дзейнасці”. Мэта — устанавіць наяўнасць і арыштаваць у падазраваных маёмасць і нерухомасць.

“З улікам атрыманых доказаў будзе разгледжанае пытанне аб запуску працэдуры спецыяльнай вытворчасці для забеспячэння прынцыпу няўхільнасці пакарання і кампенсацыі шкоды, прычыненай злачыннымі дзеяннямі”, — сказаў Кабаковіч.

Некалькі гадзін таму праваабаронцы паведамілі пра ператрусы ў кватэрах людзей, нібыта звязаных з КР.

Каардынацыйная рада пазіцыянуе сябе як прадстаўнічы орган беларускага грамадства. Створана ў 2020 годзе, у 2022‑м адбылася яе рэформа. Дэлегаты вылучаліся самастойна і ад арганізацый грамадзянскай супольнасці. Дзейнічае за мяжой. Беларускія ўлады прызналі КР “экстрэмісцкім фармаваннем” і пагражаюць крымінальнай адказнасцю за ўдзел у ёй.

Пра першую “справу КР” можна прачытаць тут:

Ціханоўская завочна прыгаворана да 15 гадоў пазбаўлення волі, Латушка — да 18 (дапоўнена)

КДБ унёс у “спіс тэрарыстаў” яшчэ дзевяць чалавек, у тым ліку завочна прыгавораных да працяглых тэрмінаў фігурантаў “справы КР”