Ксёндз Лашук працягвае службу ў сваім храме, нягледзячы на расследаванне на прадмет парушэння ім кананічных нормаў
26 лістапада, Позірк. Пробашч касцёла св. Казіміра ў Стоўбцах (Мінская вобласць) ксёндз Ігар Лашук правёў 26 лістапада ў храме традыцыйную нядзельную службу.
Службу трансляваў ютуб-канал касцёла.
Як паведамляе тэлеграм-канал “Хрысціянская візія”, у гутарцы з прыхаджанамі Лашук пракаментаваў скандал, які разгарэўся пасля публікацыі расследавання некаторых яго дзеянняў і фактаў біяграфіі.
Ксёндз заявіў, што супраць яго “паўстаў сам д’ябал”, які “праз вусны чалавека кажа пра грахі іншага чалавека”.
23 лістапада ініцыятыва “Рабочы рух” апублікавала расследаванне “Прынц злодзеяў і негуманны Еўрапейскі суд / Грэшны беларускі ксёндз: колькі каштуе прабачэнне”. У ім сцвярджалася, што заступнікам набліжанага да Аляксандра Лукашэнкі бізнесоўца Аляксандра Зайцава з’яўляецца ксёндз Лашук. Ён нібыта атрымлівае за гэта “вялікія дывідэнды”, і ў яго двое дзяцей, хоць каталіцкаму святару забаронена мець сям’ю.
“У сувязі з інфармацыяй, атрыманай са СМІ і іншых крыніц”, 24 лістапада прэс-сакратар Мінска-Магілёўскай архідыяцэзіі Юрый Санько распаўсюдзіў паведамленне, у якім гаворыцца, што справа Лашука “расследуецца ў святле нормаў Кодэкса кананічнага права” — кодэкса юрыдычных нормаў агульнага і ўніверсальнага характару, якім кіруецца царква лацінскага абраду.
