Кавалеўскі абмеркаваў з уладамі Ісландыі падтрымку еўрапейскага выбару Беларусі з боку Рэйк’явіка

25 лістапада, Позірк. Беларуска-ісландскія стасункі абмеркаваў намеснік кіраўніцы Аб’яднанага пераходнага кабінета (АПК), прадстаўнік АПК па замежных справах Валер Кавалеўскі з чыноўнікамі і парламентарыямі Ісландыі падчас візіту ў гэтую краіну 23–24 лістапада.

Паводле інфармацыі прэс-службы АПК, ён сустрэўся з кіраўніцай дырэктарата па міжнародных справах і палітыцы Міністэрства замежных спраў Марыяй Мьёль Ёнсдоцір, палітычным дарадцам міністра Херсірам Аранам Олафсанам, дарадцам прэзідэнта Унай Сікхватсдоцір, а таксама старшынёй парламенцкага камітэта па міжнародных адносінах Дзільяй Міст Эйнарсдоцір.

Сярод іншага Кавалеўскі абмяркоўваў з імі “міграцыйную праблематыку і дапамогу Ісландыі ў вырашэнні праблем, з якімі сутыкнуліся беларусы”, “паглыбленне парламенцкага супрацоўніцтва, у тым ліку праз удзел у Альянсе за дэмакратычную Беларусь”, “працяг кантактаў на найвышэйшым палітычным узроўні”.

Размовы таксама тычыліся “пагрозы незалежнасці і нацыянальнай ідэнтычнасці Беларусі з боку Расеі” і “падтрымкі Ісландыяй еўрапейскага выбару Беларусі, удзелу у рэалізацыі крокаў па дасягненні гэтай мэты”. 

“Візіт адбываўся на тле прызначэння новага міністра замежных спраў, і важна было пачуць ад ісландскага боку, што іх палітыка па Беларусі застаецца нязменнай. Супрацоўніцтва Беларусі з Ісландыяй — прыклад таго, наколькі насычанымі і практычнымі могуць быць адносіны паміж геаграфічна аддаленымі народамі, якія аднак збліжаюць агульныя каштоўнасці, салідарнасць і спагада”, — пракаментаваў Кавалеўскі вынікі сваёй паездкі.