Пасля ператрусу затрыманы бацька пісьменніка Сашы Філіпенкі

9 лістапада, Позірк. Бацька пісьменніка і журналіста Сашы Філіпенкі затрыманы пасля ператрусу ў кватэры. Пра гэта Філіпенка паведаміў на сваёй старонцы ў “Фэйсбуку”

Паводле яго слоў, да бацькоў прыйшлі “сем чалавек з аўтаматамі”.

“Бацьку забралі. Маці сказалі: “Скажыце дзякуй сыну”. Відавочна, што ціснуць на мяне і хочуць, каб я перастаў выказвацца ў еўрапейскай прэсе”, — напісаў пісьменнік, які пражывае за мяжой.

Прычыны ператрусу і затрымання бацькі пісьменніка невядомыя.

Аляксандр Філіпенка — беларускі літаратар, журналіст, сцэнарыст, тэлевядучы.

Пасля падзей 2020 года стаў адным з галасоў беларускага пратэстнага руху ў Еўропе.

Неаднаразова выступаў у абарону беларускіх палітвязняў у расійскай, нямецкай, англійская, шведскай, галандскай, польскай, французскай прэсе. Падтрымлівае Украіну ў яе вайне супраць расійскай агрэсіі.

У ліпені 2023 года ў Вільнюсе адбылася прэм’ера спектакля паводле п’есы Сашы Філіпенкі “Ціхары”. Пастаноўка ў сатырычнай форме паказвае беларускіх сілавікоў, якія пад выглядам звычайных грамадзян высочваюць удзельнікаў пратэстаў.