17 лютага, BPN. Дэмакратычны лідар Святлана Ціханоўская, якая гэтымі днямі ўдзельнічае ў Мюнхенскай канферэнцыі па бяспецы, правядзе перамовы з федэральным канцлерам Германіі Олафам Шольцам, паведамілі BPN у офісе беларускага палітыка.
На сустрэчы плануецца абмеркаваць кааліцыю ў падтрымку дэмакратычнай Беларусі. Таксама адной з тэм будзе новая стратэгія Еўрасаюза па Беларусі, якая мяркуе, што краіну будзе прадстаўляць дэмакратычны рух, а не рэжым Аляксандра Лукашэнкі.
Бакі абмяркуюць дапамогу беларусам, што падвяргаюцца пераследу, і ціск на рэжым з мэтай вызвалення палітвязняў.
17 лютага Ціханоўская сустрэлася з кіраўніком адміністрацыі Шольца Вольфгангам Шмітам.
Размова тычылася новых санкцыйных пакетаў ЕС. Ціханоўская звярнула ўвагу суразмоўцы: важна, каб санкцыі “білі па тым, што прыносіць рэжыму даходы, пры гэтым не білі па простых беларусах”. У прыватнасці, абмяркоўвалася тэма абмежаванняў у сектары ўгнаенняў, а таксама праблема спробаў рэжыму вывесці з-пад санкцый “чыноўнікаў, якія ўдзельнічалі ў рэпрэсіях і фінансава дапамагалі ваенным дзеянням”.
На сустрэчы са Шмітам абмяркоўваўся ўдзел дэмакратычных сілаў Беларусі ў міжнародных форумах і арганізацыях, а таксама афіцыйны візіт Ціханоўскай у Берлін, які запланаваны на 24–25 красавіка.
Увечары 17 лютага адбудзецца панэльная дыскусія з удзелам Ціханоўскай і прэзідэнта Еўрапарламента Роберты Метсола пра тое, “што можа зрабіць ЕС для Беларусі, ці мае Беларусь перспектыву членства ў ЕС”.
Аўтарызавацца
Забыліся пароль?
Выхад з профілю
