Экс-палітвязняволенаму журналісту “Радыё Свабода” Алегу Груздзіловічу ўручылі літоўскую прэмію “Надзея Свабоды”

1 снежня, BPN. Экс-палітзняволенаму журналісту “Радыё Свабода” Алегу Груздзіловічу прысуджана літоўская прэмія “Надзея Свабоды”.

Ушанаванне лаўрэата адбылося ў рамках другога Форума свабоднай журналістыкі, якую 1 снежня правялі ў сейме Літвы Саюз журналістаў гэтай балтыйскай дзяржавы і Беларуская асацыяцыя журналістаў.

Узнагарода ўручана Груздзіловічу “за вернасць журналісцкаму абавязку і свабодзе слова”.

Журналіст вызваліўся з магілёўскай калоніі № 15 21 верасня — пасля амаль дзевяці месяцаў няволі (быў прыгавораны да 1,5 года калоніі паводле арт. 342 КК аб “актыўным удзеле ў дзеяннях, якія груба парушаюць грамадскі парадак”). Выйшаў на волю на падставе прашэння аб памілаванні, аднак віну не прызнаў.

Ініцыятарамі заснавання прэміі “Надзея Свабоды” і яе мецэнатамі з’яўляюцца парламентарый Казіс Старкявічус і літоўская журналісцкая супольнасць.