Забарона на наведванне лясоў уведзеная ў трох раёнах Беларусі, абмежаванне — у 13

13 красавіка, Позірк. У Пухавіцкім і Валожынскім раёнах Мінскай вобласці, а таксама ў Магілёўскім раёне ўведзеная забарона на наведванне лясоў, вынікае з актуальнай інтэрактыўнай мапы на сайце Міністэрства лясной гаспадаркі.

У 13 раёнах — у асноўным на захадзе краіны — наведванне лясоў абмежаванае. У Гродзенскай вобласці гэта Бераставіцкі, Ваўкавыскі, Гродзенскі, Мастоўскі, Ашмянскі, Свіслацкі, Смаргонскі і Шчучынскі раёны; Брэсцкай — Жабінкаўскі, Кобрынскі і Пружанскі; Віцебскай — Верхнядзвінскі; Мінскай — Слуцкі.

10 красавіка начальнік цэнтра ўзаемадзеяння з грамадскасцю і СМІ Міністэрства па надзвычайных сітуацыях Максім Клачко паведаміў, што сёлета падраздзяленнямі ведамства зафіксаваныя прыродныя пажары: тарфяныя — 3, лясныя — 81, травы і кустоў — 2.283.

У выніку пажараў у экасістэмах ад пачатку года загінула тры чалавекі.