Наведваючы на Вялікдзень царкву, Лукашэнка зноў успомніў 2020 год
12 красавіка, Позірк. Царкву Свяціцеля Мікалая Цудатворца ў аграгарадку Еўдакімавічы Шклоўскага раёна (Магілёўская вобласць) наведаў 12 красавіка з нагоды Вялікадня Аляксандр Лукашэнка, паведамляе яго прэс-служба.
Выступаючы перад прыхаджанамі, палітык заявіў: “Павінен сказаць, што нам скардзіцца няма на што, мы жывем, самае галоўнае, у міры і згодзе. Без войнаў, без сутыкненняў ужо пасля 2020 года некалькі гадоў. І гэта самая галоўная заваёва нашага народа”.
Паводле слоў Лукашэнкі, у Беларусі “створаныя ўсе ўмовы для таго, каб людзі маглі працаваць і жыць годна”. “Так будзе ў нашай Беларусі. Хто працуе і хоча нармальна жыць, той атрымлівае адпаведнае ад гэтага жыцця”, — дадаў ён.
Беларусь нярэдка называюць маленькай краінай, хоць гэта “не зусім так”, адзначыў палітык. “І ўсюды жывуць вельмі харошыя і добрыя людзі — ад Гродна да Оршы. Усім чымсьці трэба дапамагчы. Але я як чалавек вясковы лічу, што дапамагаць трэба там, дзе трэба. Як толькі мы пачынаем дапамагаць там, дзе не трэба, мы становімся іншымі. Не хачу ў гэты святочны дзень казаць якімі, вы выдатна ведаеце”, — сказаў Лукашэнка, не ўдакладніўшы, што мае на ўвазе.
Раней 12 красавіка Лукашэнка павіншаваў “дарагіх суайчыннікаў” з Вялікаднем у паведамленні на сваім сайце.
Праваслаўе ў Беларусі лічыцца дамінантнай хрысціянскай канфесіяй. Руская праваслаўная царква лічыць беларускую зямлю сваёй кананічнай тэрыторыяй, а Беларускі экзархат ёсць часткай РПЦ.
Многія вернікі і рэлігійныя дзеячы адкрыта выказваліся пра грамадска-палітычны крызіс, што ўзнік на фоне сфальсіфікаваных прэзідэнцкіх выбараў 2020 года і жорсткасці сілавікоў у дачыненні да ўдзельнікаў пратэстных акцый, у выніку чаго рэжым Лукашэнкі ўзмацніў кантроль за рэлігійнай сферай.
У 2023 годзе на заканадаўчым узроўні рэлігійным арганізацыям фактычна забаранілі праяўляць палітычную актыўнасць не ў фарватары ўладаў і абавязалі перарэгістравацца.
З пачатку восені 2020 года па 21 сакавіка 2026-га, згодна з данымі ініцыятывы “Хрысціянская візія”, з рэпрэсіямі ў Беларусі ў той ці іншай форме сутыкнулася 93 хрысціянскія служыцелі: каталіцкага касцёла — 37, евангельскіх цэркваў — 31, праваслаўнай царквы — 20, грэка-каталіцкай царквы — 5.
