На вучэннях адпрацоўваецца прымяненне компекса “Тор-М2“

8 красавіка, Позірк. Аб правядзенні тактычных вучэнняў у адным з зенітных ракетных палкоў “па прыкрыцці найбольш важных аб’ектаў і войскаў у любым раёне Беларусі” паведаміла 8 красавіка прэс-служба Міністэрства абароны.

Манеўры ажыццяўляюцца пад кіраўніцтвам начальніка зенітных ракетных войскаў — начальніка ўпраўлення зенітных ракетных войскаў камандавання ВПС і войскаў СПА Андрэя Севярынца.

Вайскоўцы “здзяйсняюць маршы ў новыя пазіцыйныя раёны, адбіваюць удары ўмоўнага паветранага праціўніка”, “выкарыстоўваюцца элементы сумеснай працы сістэм “Тор-М2″ з мабільнымі агнявымі групамі”.

“Сёння каля 2 тыс. чалавек выконваюць задачы баявога дзяжурства і забяспечваюць прыкрыццё дзяржаўных межаў у паветранай прасторы. Гэта баявыя разлікі радыётэхнічных войскаў, авіяцыі, зенітных ракетных войскаў і вайсковай СПА”, — сказаў Севярынчык.

На ўзбраенні палка, дыслакацыю і назву якога ён не раскрыў, знаходзіцца згаданы ЗРК, які паказаў “высокія характарыстыкі па паражэнні любога класа мэтаў і манеўраныя магчымасці“.

“Яго мабільнасць дазваляе выканаць задачы па прыкрыцці не толькі стацыянарных аб’ектаў, але і войскаў, якія перамяшчаюцца на поле бою”, — падкрэсліў начальнік упраўлення.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Рэжым Лукашэнкі практычна безупынна праводзіць вучэнні сілавікоў, у тым ліку ў войску.