Урад уключыў у склад “Беллегпрама” 10 прадпрыемстваў для прасоўвання іх тавараў “на ўнутраным і знешнім рынках”

9 красавіка, Позірк. Пастановай урада ў склад канцэрна “Беллегпрам” уключаныя 10 прадпрыемстваў, дакумент падпісаны прэм’ер-міністрам Аляксандрам Турчыным.

Як паведамляе прэс-служба ўрада, у склад канцэрна ўключаныя: фабрыка “Світанак” (Жодзіна, Мінская вобласць), “Фабрыка галаўных убораў “Людміла” (Мінск), ТАА “КПВС” (вытворца спецадзення і спецабутку, Івацэвічы, Брэсцкая вобласць), ТАА “СаюзТэкстыль” (Пінск, Брэсцкая вобласць), ТАА “СПЕЦславія” (Хойніцкі раён, Гомельская вобласць), ТАА “Фурнітур-ВУ” (Мінск), швейная фабрыка “Элема” (Мінск), УП “Хімічная вытворчасць” (Мінск), СТАА “Нёман-Сплаў” (Гродна), унітарнае прадпрыемства “ПроКовер” (Мінск).

Мэтай уваходжання гэтых прадпрыемстваў у склад канцэрна “Беллегпрам” з’яўляецца “магчымасць прасоўвання тавараў лёгкай прамысловасці на ўнутраным і знешнім рынках”, а таксама ўдзел у інвестыцыйных праграмах для “ўкаранення новых і высокіх тэхналогій і абсталявання, якія адпавядаюць сусветнаму ўзроўню”, гаворыцца ў паведамленні.

Таксама ўрад разлічвае, што прынятае рашэнне прывядзе да павышэння якасці і канкурэнтаздольнасці вырабленай прадукцыі, а таксама міжгаліновай кааперацыі паміж названымі арганізацыямі і арганізацыямі канцэрна.

У 2024 годзе прадукцыя беларускай лёгкай прамысловасці пастаўлялася ў 73 краіны, годам раней — у 77 (-5,2%), сведчыць праведзены “Позіркам” аналіз даных Нацыянальнага статыстычнага камітэта.

Паводле інфармацыі Белстата, у 2022 годзе айчынныя тавары гэтай галіны экспартаваліся ў “больш чым 90 краін”.

Таццяна Лугіна, якая на той момант займала пасаду старшыні канцэрна “Беллегпрам”, заявіла 3 чэрвеня 2025 года, што ў 2024 годзе экспарт прадукцыі аб’яднання ў краіны Еўрапейскага саюза павялічыўся на 26% і склаў “суму досыць нядрэнную”.

Паводле яе слоў, прадпрыемствы “Беллегпрама” ажыццяўлялі пастаўкі ў Нідэрланды, Літву, Польшчу, Латвію, Эстонію. “Бачыце, санкцыі ёсць, тым не менш некаторыя краіны становяцца больш лаяльныя да некаторых асартыментных пазіцый”, — сказала Лугіна.

Яна таксама паведаміла, што каля 70% прадпрыемстваў канцэрна прадстаўленыя на расійскіх маркетплейсах Wildberries, Lamoda і Ozon.

У кастрычніку 2025 года Лугіна Лунгіна была ўзгоднена на пасаду гендырэктара ААТ “Камволь”, старшынёй канцэрна “Беллегпрам” стала Надзея Лазарэвіч, якая раней была першым намеснікам старшыні Мінгарвыканкама.