Германія “адгукаецца на просьбы” аб інфармацыі па справе аб генацыдзе беларускага народа — Генпракуратура

8 красавіка, Позірк. Германія “адгукаецца на просьбы“ Мінска аб накіраванні інфармацыі ў межах крымінальнай справы аб генацыдзе беларускага народа, даючы архіўныя дакументы, заявіў у інтэрв’ю “Першаму інфармацыйнаму“ тэлеканалу кіраўнік профільнай следчай групы Генпракуратуры Валерый Талкачоў.

Паводле яго слоў, наглядны орган накіроўваў пракуратурам краін ЕС “адпаведныя выданні” па тэматыцы. “Водгук быў. У Генеральнай пракуратуры Германіі шкадуюць аб тым, што адбывалася, аднак наколькі шчырыя гэтыя шкадаванні, мне цяжка ацэньваць. Але, аднак, трэба аддаць належнае, што ў сучасных умовах з нямецкім бокам у прынцыпе ў нас ёсць кантакт. У адрозненне, да прыкладу, ад краін Балтыі, Польшчы, якія да цяперашняга часу не выканалі ніводнай нашай просьбы па крымінальнай справе і, прама кажучы, і не будуць іх выконваць“, — заявіў Талкачоў.

Ён пагадзіўся з выказваннем вядучай, што “ў краінах Балтыі і ў іншых заходніх краінах“ да ўлады нібыта прыходзяць “нашчадкі нацыстаў, якія забівалі мірнае насельніцтва Беларусі“: “Так, у тым ліку і з гэтай прычыны [адмаўляюць], каб не паказваць сапраўдны твар сваіх прадзедаў, якія здзяйснялі зверствы на тэрыторыі БССР”.

Спасылаючыся на падлікі ананімных “гісторыкаў і навуковых работнікаў“, пракурор заявіў, што, калі б не было страт, панесеных Беларуссю ў гады Вялікай Айчыннай вайны, яе цяперашняе насельніцтва склала б “каля 17 млн чалавек“.

Паводле яго сцвярджэння, прамая шкода, нанесеная Беларусі ў вайне, склала не менш за 43,8 тыс. тон золата, або не менш за 6 трлн 172 млрд долараў (на студзень 2026 года).

Аналагічныя лічбы прывяла 7 красавіка прэс-служба Дзяржкаммаёмасці.

У сакавіку 2025 года намеснік генпракурора Аляксей Стук ацэньваў падобную шкоду ў 43,5 тыс. тон золата, або 2,35 трлн долараў. Верагодна, рост звязаны з павышэннем цэн на золата ў свеце, які назіраўся апошні год.

У 2021 годзе быў прыняты закон “Аб генацыдзе беларускага народа” (у красавіку таго ж года была ўзбуджаная крымінальная справа па факце генацыду беларускага народа). Пры гэтым пад беларускім народам “для мэт гэтага закона разумеюцца савецкія грамадзяне, якія пражывалі на тэрыторыі Беларускай Савецкай Сацыялістычнай Рэспублікі ў перыяд Вялікай Айчыннай вайны і (або) пасляваенны перыяд” (да 31 снежня 1951 года).

За “адмаўленне генацыду беларускага народа” арт. 130² КК прадугледжвае да 5 гадоў зняволення, за паўторнае парушэнне закона — ад 3 да 10 гадоў.

У ліпені 2023 года набылі моц змены ў Крымінальна-працэсуальны кодэкс, якія дазваляюць пераследваць памерлых у крымінальным парадку.

У 2024-2025 гадах паводле арт. 127 вінаватымі прызнаныя Уладзімір Катрук, Канстанцін Смоўскі, Сямён Серафімовіч, Восіп Вінніцкі і Аляксандр Ярмольчык. Пакаранні ва ўсіх гэтых выпадках не прызначаліся, паколькі гаворка ішла пра памерлых.

11 сакавіка Генеральная пракуратура паведаміла, што ў Вярхоўным судзе “пастаноўлены прысуд у дачыненні да Ганса Зіглінга, які ўваходзіў у склад СС і ахоўнай паліцыі“. Ведамства адзначыла, што гэта “шосты ў гісторыі суверэннай Беларусі прысуд па крымінальнай справе аб генацыдзе беларускага народа ў гады Вялікай Айчыннай вайны, які пастаноўлены без прызначэння пакарання ў сувязі са смерцю абвінавачанага”.