Місія МАГАТЭ па ацэнцы бяспекі эксплуатацыі БелАЭС запланаваная на травень
8 красавіка, Позірк. Эксперты Міжнароднага агенцтва па атамнай энергіі (МАГАТЭ) 4–21 траўня ацэняць бяспеку эксплуатацыі Беларускай АЭС (місія OSART), сведчыць каляндар падзей на сайце МАГАТЭ.
Раней агенцтва папярэдне планавала правесці гэтую місію ў першым квартале 2026 года.
У рамках місіі OSART, паводле інфармацыі на профільнай старонцы на сайце МАГАТЭ, міжнародная група экспертаў праводзіць паглыблены аналіз працы АЭС, супастаўляючы фактычную практыку на аб’екце з укаранёнымі стандартамі бяспекі.
Асноўная мэта місіі заключаецца ў тым, каб даць кіраўніцтву АЭС, арганізацыям-эксплуатантам і органам-рэгулятарам аб’ектыўную і незалежную ацэнку стану бяспекі станцыі.
Эксперты аналізуюць мноства параметраў, у тым ліку ў сферы кіравання, радыяцыйнай абароны, тэхнічнага абслугоўвання, аварыйнай гатоўнасці. Па выніках місіі станцыя атрымлівае кропкавыя рэкамендацыі па запаўненні выяўленых прабелаў і прапановы, як падвысіць эфектыўнасць сваёй дзейнасці ў плане бяспекі.
Збудаванне Беларускай АЭС паблізу Астраўца (Гродзенская вобласць) завяршылася ўвосені 2023 года. Станцыя пабудаваная на падставе расійскага праекта, генеральным падрадчыкам выступіў “Расатам”. Першы энергаблок АЭС сілкуе энергасістэму Беларусі з 3 лістапада 2020 года, другі — з 13 траўня 2023-га. У прамысловую эксплуатацыю яны ўведзеныя ў чэрвені 2021-га і лістападзе 2023-га адпаведна.
У сярэдзіне лістапада 2025 года стала вядома, што ўлады маюць намер пабудаваць трэці энергаблок БелАЭС (уключыць у энергасістэму плануецца ў 2035–2038 гадах), але не адмаўляюцца ад ідэі збудаваць другую атамную станцыю — ва ўсходняй частцы краіны.
