Жыхар Магілёва асуджаны на 15,5 года пазбаўлення волі за замах на забойства партнёркі
7 красавік, Позірк. Жыхар Магілёва прыгавораны да 15,5 года пазбаўлення волі з адбываннем пакарання ў калоніі ўзмоцненага рэжыму, паведамляе Следчы камітэт.
Мужчына прызнаны вінаватым паводле ч. 1 арт. 14, п. 6 ч. 2 арт. 139 (замах на забойства, учынены з асаблівай жорсткасцю), арт. 366 (гвалт у дачыненні да асобы, якая выконвае грамадскі абавязак) Крымінальнага кодэкса.
Паводле звестак следства, 31 жніўня мінулага года фігурант, знаходзячыся ў стане алкагольнага ап’янення, накінуўся на партнёрку падчас канфлікту. Ён “наносіў пацярпелай удары па розных частках цела, цягаў яе за валасы, душыў і выказваў пагрозы забойствам”.
Калі жанчына паспрабавала пакінуць кватэру, абвінавачаны “зрэзаў яе валасы нажом”.
Пасля гэтага пара апынулася на балконе, там фігурант справы “спрабаваў акунаць галаву яе ў раствор вадкіх шпалер, абліваў вадой і ўдарыў керамічным кубкам”. Затым “сапхнуў сужыцельку з балкона кватэры, размешчанай на другім паверсе, выліў на яе ваду з чайніка і кінуў ёмістасць у ахвяру”.
Выбегшы на вуліцу, мужчына схапіў ахвяру за валасы, зацягнуў у жыллё, дзе “працягнуў збіццё”.
Адзначаецца, што ўвесь гэты час у кватэры знаходзілася маці пацярпелай, якая спрабавала спыніць гвалт. Аднак “агрэсар ударыў яе і з сілай адштурхнуў, пасля чаго працягнуў супрацьпраўныя дзеянні”.
СК паведамляе, што “дзякуючы пільнасці суседзяў”, якія выклікалі міліцыю і хуткую, “удалося пазбегнуць трагедыі”. Пацярпелую шпіталізавалі з сур’ёзнымі траўмамі.
Згодна з заключэннем судова-медыцынскай экспертызы, у жанчыны выяўлена не менш за 18 цялесных пашкоджанняў.
Падставай для агрэсіі, згодна з матэрыяламі справы, стала “нежаданне пацярпелай мірыцца з ладам жыцця мужчыны, які злоўжывае спіртнымі напоямі, і пражываць з ім”.
“У дзень трагедыі абвінавачаны запрасіў маці сваёй партнёркі ў кватэру на падставе дэманстрацыі рамонту, дзе прапанаваў распіваць алкаголь. Падчас застолля фігурант папрасіў дапамагчы памірыцца з каханай, аднак атрымаў адмову, што і стала прычынай канфлікту”, — гаворыцца ў паведамленні.
Экспертыза прызнала абвінавачанага асобай, якая “магла усведамляць фактычны характар і грамадскую небяспеку сваіх дзеянняў”. Устаноўлены ў яго “сіндром залежнасці ад алкаголю” не пазбаўляў яго “здольнасці кіраваць сваімі ўчынкамі ў момант здзяйснення злачынства”.
Абвінавачаны сваю віну не прызнаў. Прысуд у законную сілу не ўступіў і можа быць абскарджаны.
Паводле даных МУС за 2024 год, на прафуліку было 21 тыс. чалавек, якія ўжывалі гвалт дома. Штогод у Беларусі фіксуецца каля 80 тыс. паведамленняў аб хатнім гвалце.
Паводле даных апытання, праведзенага ў 2023 годзе анлайн-лініяй для пацярпелых ад хатняга гвалту oliviahelp.org пры падтрымцы Chatham House (Каралеўскі інстытут міжнародных адносін, Вялікабрытанія), у Беларусі розным відам гэтага гвалту падвяргаецца 17,6% гараджанак, якія маюць партнёра.
У верасні 2021 года Вярхоўны суд ліквідаваў міжнароднае грамадскае аб’яднанне “Гендэрныя перспектывы”, якое займалася праблемамі хатняга гвалту і палавой дыскрымінацыі.
9 сакавіка 2022 года Мінскі гарадскі суд ліквідаваў грамадскае аб’яднанне “Радзіслава”, якое было створана ў 2002 годзе ў Мінску для дапамогі жанчынам, якія пацярпелі ад гвалту. “Радзіслава” адміністравала кругласутачную гарачую лінію і ўтрымлівала на грамадскіх пачатках прытулак для ахвяр хатняга гвалту. З дня ліквідацыі шэлтэр і кругласутачная гарачая лінія не працуюць.
У Беларусі няма закона аб супрацьдзеянні хатняму гвалту. Адпаведны дакумент распрацоўваўся некалькі разоў. У кастрычніку 2018 года чарговы варыянт рэзка раскрытыкаваў Аляксандр Лукашэнка, назваўшы яго “дурасцю, узятай перш за ўсё з Захаду”.
Лукашэнка неаднаразова дапускаў дыскрымінуючыя выказванні ў адрас жанчын, маскіруючы гэта пад клопат пра іх. У прыватнасці, ён заяўляў, што беларуская Канстытуцыя напісана “не пад жанчыну” і што жанчына не можа быць вярхоўным галоўнакамандуючым.
ДзяржСМІ замацоўваюць у сваёй прапагандзе гендарную няроўнасць як сацыяльную норму.
