“Праваслаўны атэіст” Лукашэнка назваў хрысціянскія дабрадзейнасці “непарушным маральным арыенцірам”

5 красавіка, Позірк. “Непарушным маральным арыенцірам” назваў хрысціянскія дабрадзейнасці Аляксандр Лукашэнка ў віншаванні 5 красавіка з нагоды Вялікадня.

“Навіна аб Уваскрасенні Хрыстовым і ўсведамленне велічы свята перамяняюць духоўна, мы імкнемся жыць па сумленні, паступаць па справядлівасці, быць больш міласэрным да навакольных”, — цытуе віншавальніка яго прэс-служба.

Лукашэнка, які раней называў сябе “праваслаўным атэістам”, таксама заявіў, што хрысціянскія каштоўнасці не губляюць актуальнасці “на працягу многіх стагоддзяў” і аб’ядноўваюць “беларусаў на стварэнне пад мірным небам”.

У віншаванні мітрапаліту Мінска-Магілёўскаму архіепіскапу Іосіфу Станеўскаму Лукашэнка заявіў: “Шмат стагоддзяў вернікі адзначаюць у гэты дзень перамогу жыцця, дабра і святла, якія з новай сілай абуджаюць у душах веру, надзею, любоў”.

Хрысціянскія каштоўнасці, паводле слоў палітыка, “моцна ўплеценыя ў духоўны код беларускага народа, яны аб’ядноўваюць людзей, вучаць спачуванню і міласэрнасці, дапамагаюць захоўваць мір і згоду на роднай зямлі”.

5 красавіка каталікі, грэка-каталікі і пратэстанты адзначаюць найстаражытнае і самае важнае хрысціянскае свята — Уваскрасенне Хрыстова, або Вялікдзень.

Многія вернікі і рэлігійныя дзеячы адкрыта выказваліся пра грамадска-палітычны крызіс, што ўзнік на фоне сфальсіфікаваных прэзідэнцкіх выбараў 2020 года і жорсткасці сілавікоў у дачыненні да ўдзельнікаў пратэстных акцый, у выніку чаго рэжым Аляксандра Лукашэнкі ўзмацніў кантроль за рэлігійнай сферай.

У 2023 годзе на заканадаўчым узроўні рэлігійным арганізацыям фактычна забаранілі праяўляць палітычную актыўнасць не ў фарватары ўладаў і абавязалі перарэгістравацца.

З пачатку восені 2020 года па 21 сакавіка 2026-га, згодна з данымі ініцыятывы “Хрысціянская візія”, з рэпрэсіямі ў Беларусі ў той ці іншай форме сутыкнулася 93 хрысціянскія служыцелі: каталіцкага касцёла — 37, евангельскіх цэркваў — 31, праваслаўнай царквы — 20, грэка-каталіцкай царквы — 5.