Ад пачатку года на пажарах у Беларусі загінула 240 чалавек

4 красавіка, Позірк. Ад пачатку 2026 года ў Беларусі здарылася 2.411 пажараў — на 21,2% больш, чым за аналагічны леташні перыяд (1.989), сведчыць праведзены “Позіркам” аналіз аператыўных даных Міністэрства па надзвычайных сітуацыях.

На пажарах выратавана 207 чалавек (124; +66,9%), траўмавана — 225 (139; +61,9%).

Ад агню загінула 240 чалавек — на 19,4% больш, чым за той жа перыяд 2025-га (201).

Варта адзначыць, што з канца мінулага месяца МНС некалькі разоў карэктавала статыстыку па смерцях у бок памяншэння.

Напрыклад, пасля абнаўлення зводнай таблічы на ​​сайце ведамства па выніках дзяжурных сутак, якія цягнуліся з 6:00 26 сакавіка па 6:00 27 сакавіка, налічвалася 239 ахвяр агню ад пачатку года. На наступны дзень было абвешчана, што загінуў яшчэ адзін чалавек, аднак агульная колькасць не павялічылася, а зменшылася — да 237.

Акрамя таго, за мінулыя дзяжурныя суткі (з 6:00 3 красавіка да 6:00 4 красавіка) у Беларусі загінула два чалавекі (абодва — у Віцебску), але колькасць ахвяр ад пачатку года з 239 вырасла не да 241, а да згаданага ліку — 240.

Раней МНС тлумачыла перыядычнае карэктаванне даных тым, што часам пасля правядзення судова-медыцынскай экспертызы высвятляецца — смерць здарылася не праз пажар. Наадварот, як заяўляла ведамства, узгаранне часам можа ўзнікнуць пасля смерці чалавека.