У Польшчы за падпалы гандлёвых аб’ектаў і супрацоўніцтва з выведкай РФ будуць судзіць пецярых замежнікаў, сярод абвінавачаных — беларус
3 красавіка, Позірк. У суд накіраваная крымінальная справа ў дачыненні да пяці замежнікаў, якія абвінавачваюцца ў падпалах гандлёвых аб’ектаў і супрацоўніцтве з расійскай выведкай, сярод фігурантаў — грамадзянін Беларусі, паведамляе Нацыянальная пракуратура Польшчы.
Расследаванне, як адзначаецца, “тычылася дзейнасці арганізаванай злачыннай групы, якая здзяйсняла акты сабатажу і злачынствы тэрарыстычнага характару, дзейнічаючы ў інтарэсах замежнай выведкі Расійскай Федэрацыі”.
У ходзе следства ўстаноўлена, што на тэрыторыі Польшчы, Літвы, Латвіі і іншых еўрапейскіх краін дзейнічала арганізаваная група, мэтай якой было здзяйсненне дыверсій і тэрарыстычных злачынстваў, якія заключаліся ў падпалах гандлёвых цэнтраў і гіпермаркетаў.
Дзеянні здзяйсняліся “з мэтай застрашвання шырокага кола асоб і, як следства, уздзеяння на грамадскую думку” (арт. 258 § 2 КК Польшчы).
Абвінаваўчае заключэнне ахоплівае дзеянні, звязаныя з удзелам у наступных актах сабатажу ў 2024 годзе: падпал крамы OBI па вул. Радзіміньскай у Варшаве (13–14 красавіка); падпал крамы IKEA ў Вільнюсе (9 траўня); падпал гандлёвага цэнтра “Marywilska 44” у Варшаве (12 траўня); падрыхтоўка да падпалу крамы IKEA ў Рызе (травень).
Абвінавачванне выстаўленае пяці асобам: Аляксандру Г., Віталю К., Паўло Т., Даніілу Б. (усе — грамадзяне Украіны), а таксама Сцяпану К. (грамадзянін Беларусі). Беларусу ставіцца ў віну адзін пункт абвінавачвання за падпал крамы OBI ў Варшаве паводле арт. 130 § 7 КК у сукупнасці з арт.163 § 1 п. 1 КК (удзел у акце сабатажу шляхам вырабу і выкарыстання запальнай прылады, а таксама ўдзел у падрыхтоўцы да наступных падпалаў).
Злачынства паводле арт. 130 § 7 КК Польшчы, як паведамляецца, караецца пазбаўленнем волі на тэрмін не менш за 10 гадоў альбо пажыццёвым зняволеннем.
Паведамляецца, што 14 красавіка 2024 года ў Варшаве згарэў гіпермаркет OBI. Паводле версіі следства, выканаўцам быў Сцяпан К., які 13 красавіка пакінуў у будынку прыладу для дыстанцыйнага падпалу, якая спрацавала ўначы. Шкода склала больш за 3,5 млн злотых (каля 950 тыс. долараў па сённяшнім курсе).
Вінаваты здымаў свае дзеянні на тэлефон, пазней матэрыялы былі апублікаваныя на расійскіх прапагандысцкіх рэсурсах.
6 жніўня 2025 года пракуратура Польшчы накіравала ў Акруговы суд Вроцлава крымінальную справу ў дачыненні да шасці членаў арганізаванай злачыннай групы, якіх абвінавачваюць у “арганізацыі і ажыццяўленні актаў сабатажу, незаконным абароце зброі і наркотыкаў, а таксама ў іншых злачынствах”.
Фігурантамі справы праходзілі трое грамадзян Польшчы (Каміль К., Давід П., Лукаш К.) і трое — Беларусі (Сцяпан К., Андрэй Б., Яраслаў С.).
Абвінаваўчае заключэнне тычылася: падпалу і пажару ў рэстаране ў Гдыні (2023 год) і падпалу склада паддонаў у Марках (усходні прыгарад Варшавы) на замову замежнай выведкі (2024 год). Па гэтых эпізодах праходзілі Сцяпан К. і Андрэй Б.
13 лістапада 2024 года стала вядома, што супрацоўнікі Агенцтва ўнутранай бяспекі Польшчы (АВБ) затрымалі ў Варшаве грамадзяніна Беларусі, якога падазраюць у спробе падпалу аб’екта, размешчанага ў Гданьску.
Адзначалася, што гэта “чарговы арышт у рамках расследавання дзейнасці арганізаванай злачыннай групы, якая па замове замежных спецслужбаў здзяйсняла дыверсіі, у прыватнасці, падпалы”.
28 траўня 2024 года стала вядома, што АВБ затрымала ў Варшаве траіх падазраваных у здзяйсненні і падрыхтоўцы падпалаў і дыверсій на тэрыторыі краіны.
Заяўлялася, што ў ліку затрыманых паляк і два беларусы. Адзін з беларускіх грамадзян можа быць экс-супрацоўнікам МУС, другі — раней судзімым былым байцом ММА.
Паводле звестак аб’яднання былых сілавікоў ByPol, усе трое затрыманых па “справе аб падпалах” раней удзельнічалі ў баявых дзеяннях на тэрыторыі Украіны на баку УСУ, служылі ў складзе батальёна “Тэрор”. Пры гэтым яны “выкарыстоўваліся расійскімі спецслужбамі “ўцёмную”, выконваючы за грошы ў Польшчы крымінальныя заказы”.
Арганізацыя называла імёны дваіх — Андрэй Белы і Сцяпан Касцючэнка.
