МНС адсправаздачылася аб ліквідацыі ў Мінску наступстваў разліву азотнай кіслаты

3 красавіка, Позірк. Аб ліквідацыі ў Мінску наступстваў разліву неканцэнтраванай азотнай кіслаты паведамляе Міністэрства па надзвычайных сітуацыях.

Кіслата пралілася з грузавога аўтамабіля “на тэрыторыі прадпрыемства на вул. Бабушкіна”, адзначае ведамства.

“Падраздзяленні МНС устанавілі, што ў фуры знаходзяцца еўракубы з азотнай кіслатой (15 ёмістасцяў па 1 м3). Падраздзяленні МНС стварылі пенную падушку і абмежавалі распаўсюджванне пароў вадкасці арашальнікамі. Ратавальнікі перапампавалі неканцэнтраваную азотную кіслату з двух пашкоджаных ёмістасцяў у рэзервовыя”, — гаворыцца ў паведамленні.

Падкрэсліваецца, што пасля правядзення работ перавышэння гранічна дапушчальнай канцэнтрацыі пароў не зафіксавана.

Пацярпелых няма. Прычына здарэння высвятляецца.

“На месцы інцыдэнту працавала 10 адзінак тэхнікі”, — паведамляе МНС.