Палітвязнямі прызнана яшчэ шэсць чалавек

30 сакавіка, Позірк. Беларуская праваабарончая супольнасць у сувязі з інфармацыяй аб вынясенні абвінаваўчых прысудаў прызнала палітычнымі зняволенымі яшчэ шэсць чалавек, вынікае з сумеснай заявы, апублікаванай у тым ліку на сайце цэнтра “Вясна”.

Палітвязнямі прызнаныя: Аляксандр Кармановіч (прыгавораны да двух гадоў абмежавання волі з накіраваннем у папраўчую ўстанову адкрытага тыпу (ПУАТ) паводле арт. 368 Крымінальнага кодэкса); Дзмітрый Каліноўскі (пазбаўленне волі, тэрмін невядомы, арт. 361 КК); Арцём Бацішчаў (2 гады абмежавання волі з накіраваннем у ПУАТ, арт. 369 КК); Жанна Аўрамчык (пазбаўленне волі, тэрмін невядомы, арт. 369 КК); Аляксандр Піўчук (абмежаванне волі з накіраваннем у ПУАТ, тэрмін невядомы, арт. 370, 369, 368, 367 КК); Аксана Вальковіч (пазбаўленне волі, тэрмін невядомы, арт. 369, 368 КК).

Праваабаронцы патрабуюць ад уладаў неадкладна вызваліць усіх палітвязняў і спыніць палітычныя рэпрэсіі ў краіне.

Акрамя “Вясны”, заяву падпісалі Беларускі ПЭН, Беларускі дом правоў чалавека ім. Барыса Звозскава, Беларуская асацыяцыя журналістаў, Беларускі Хельсінкскі камітэт, “Прававая ініцыятыва” і Lawtrend.

На 25 сакавіка ў спісе “Вясны” 913 палітвязняў.

Даведка “Позірку”:

арт. 361 КК — заклікі да мер абмежавальнага характару (санкцый) , іншых дзеянняў, накіраваных на прычыненне шкоды нацыянальнай бяспецы Рэспублікі Беларусь;

367 — паклёп на прэзыдэнта, у тым ліку які спыніў свае паўнамоцтвы;

368 — абраза прэзідэнта, у тым ліку які спыніў свае паўнамоцтвы;

369 — абраза прадстаўніка ўлады;

370 — здзек над дзяржаўнымі сімваламі.