Правапапулісцкая партыя “Альтэрнатыва для Германіі” цікавіцца фінансаваннем праекта “Яўрэйская Беларусь“

Апублікавана на адкрытай версіі “Позірку” 31 сакавіка 2026 года ў 16:40

28 сакавіка, Позірк. Правапапулісцкая партыя “Альтэрнатыва для Германіі”, якую іх апаненты падазраюць у сувязях са спецслужбамі рэжымаў у Маскве і Мінску, працягваюць спробы высветліць сумы фінансавання федэральным урадам розных ініцыятыў і праектаў, не падкантрольных уладам недэмакратычных краін альбо рэалізуемых у краінах, якія супраціўляецца расійскай экспансіі.

У апошнім дэпутацкім запыце, азагалоўленым “Падтрымка праектаў, асабліва апазіцыі за мяжой“, “АдГ” просіць паведаміць падрабязнасці рэалізацыі больш чым 60 праектаў у розных краінах. Матывіроўка: некаторыя праекты, на думку правых, з’яўляюцца ўмяшаннем ва ўнутраныя справы іншых дзяржаў, а таксама ідуць насуперак прынцыпам эканомнай і эфектыўнай бюджэтнай палітыкі, закладзеным ў Федэральны бюджэтны кодэкс.

Два з пералічаных у запыце праектаў датычацца Беларусі: “Яўрэйская Беларусь — лічбавая памяць“ і “Дасье Беларусь: незалежнасць і вызваленне”.

Першы праект ажыццяўляецца сумесна з Цэнтрам беларуска-яўрэйскай культурнай спадчыны (Варшава), Інстытутам Гётэ ў Літве і праграмай “Усходняе партнёрства“ МЗС ФРГ. Мэта — стварэнне лічбавай калекцыі яўрэйскай спадчыны ў Беларусі.

Другі праект рэалізуецца на інтэрнэт-пляцоўцы dekoder.org. Там размяшчаюцца аналітычныя матэрыялы журналістаў у выгнанні, найперш беларускіх, пра падзеі ў краіне, а таксама ва ўсёй Усходняй Еўропе пасля 2020 года.

Раней урад Германіі ў інтарэсах бяспекі ўдзельнікаў засакрэціў інфармацыю аб сваіх праектах у Беларусі (а таксама ў Нікарагуа і М’янме), якую ў снежні 2025 года запытвала парламенцкая фракцыя “АдГ“.

У выпадку Беларусі гаворка ішла аб праектах з сумамі фінансавання 500 тыс. і 220 тыс. еўра. Большы рэалізуецца з 1 лістапада 2024 года па 31 кастрычніка 2027 года і датычыцца дэмакратычнага і інклюзіўнага кіравання, інклюзіўнасці і пашырэння правоў і магчымасцяў людзей з інваліднасцю, а таксама гендарнай роўнасці; меншы рэалізуецца з 1 студзеня 2024 года па 31 снежня 2027 года і датычыцца рэпрадуктыўнага, мацярынскага і дзіцячага здароўя.

У траўні 2025 года беларускае тэлебачанне паведаміла пра ператрусы ў рэдакцыях рэгіянальных недзяржаўных СМІ, якія выжылі пасля зачысткі незалежнага медыяполя, якія мелі легальныя дамовы аб супрацоўніцтве з амбасадай Германіі.

Гучны рэзананс атрымала гісторыя з выкарыстаннем працы палітвязняў беларускай фірмай дэпутата ў федэральнай зямлі Саксонія ад “АдГ” Ёрга Дорнау.

Гл. таксама:

“Вон адсюль!” Ультраправы нямецкі дэпутат-бізнесмен выклікаў паліцыю на журналістаў і былога вязня, які працаваў на яго беларускім прадпрыемстве

“Альтэрнатыва для Германіі” працягвае цікавіцца нямецкім фінансаваннем фонду BySol (абноўлена і дапоўнена)

Дэпутат ад правапапулісцкай нямецкай партыі наведвае Беларусь па запрашэнні ЛДПБ — Гайдукевіч