Колькасць насельніцтва за гады кіравання Лукашэнкі скарацілася на 1,2 млн (дапоўнена)

27 сакавіка, Позірк. Колькасць насельніцтва Беларусі на 1 студзеня 2026 года склала 9 млн 56 тыс. 80 чалавек — на 1 млн 154 тыс. 323 менш, чым на аналагічную дату 1995 года (10 млн 210 тыс. 403; -11,3%), вынікае з праведзенага “Позіркам” аналізу звестак Нацыянальнага статыстычнага камітэта.

Гарадское насельніцтва скарацілася за 30 гадоў на 0,4% (з 7 млн 182 тыс. 690 да 7 млн 157 тыс. 309), сельскае — у 1,7 раза (з 3 млн 278 тыс. 177 да 1 млн 898 тыс. 771).

У рэгіянальным разрэзе дэмаграфічная сітуацыя палепшылася толькі ў Мінску, дзе насельніцтва за названы перыяд павялічылася на 19,8% (з 1 млн 665 тыс.580 да 1 млн 995 тыс. 91).

Ва ўсіх абласцях зафіксаванае зніжэнне. Найгоршая дынаміка ў Віцебскай вобласці, дзе насельніцтва скарацілася больш чым на чвэрць — на 25,6% (з 1 млн 426 тыс. 433 да 1 млн 60 тыс. 687).

У Магілёўскай вобласці жыхароў стала менш на 22,7% (з 1 млн 244 тыс. 621 да 962 тыс. 53), Гродзенскай — на 19,2% (з 1 млн 208 тыс. 623 да 976 тыс. 218), Гомельскай — на 16,2% (з 1 млн 571 тыс. 663 да 1 млн 316 тыс. 666), Брэсцкай — на 13,8% (з 1 млн 497 тыс. 387 да 1 млн 290 тыс. 628), Мінскай — на 8,9% (з 1 млн 596 тыс. 96 да 1 млн 454 тыс. 737).

Колькасць насельніцтва Беларусі на пачатак 2025 года складала 9 млн 109 тыс. 280, 2024-га — 9 млн 155 тыс. 978, 2023-га — 9 млн 200 тыс. 617, 2022-га — 9 млн 255 тыс. 524, 2021-га — 9 млн 349 тыс. 645, 2020-га — 9 млн 410 тыс. 259.

Даныя Белстата могуць не ўлічваць масавую эміграцыю людзей з Беларусі па палітычных і эканамічных матывах, якая працягваецца з 2020 года.

Аляксандр Лукашэнка прыйшоў да ўлады па выніках прэзідэнцкіх выбараў улетку 1994 года.