Рыжанкоў заявіў пра “хімію” паміж Лукашэнкам і Кім Чэн Ынам і анансаваў адкрыццё амбасады ў Паўночнай Карэі

27 сакавіка, Позірк. Мінск і Пхеньян будуць “прапрацоўваць пытанні” аб адкрыцці беларускай амбасады ў Паўночнай Карэі і падрыхтоўцы пагаднення аб бязвізавых паездках грамадзян, заявіў 27 сакавіка дзяржСМІ міністр замежных спраў Максім Рыжанкоў па выніках афіцыйнага візіту Аляксандра Лукашэнкі ў КНДР.

Гаворачы аб сустрэчы Лукашэнкі і старшыні Дзяржаўных спраў Карэйскай Народна-Дэмакратычнай Рэспублікі Кім Чэн Ына, кіраўнік МЗС заявіў пра “хімію”, якая “адразу ўзнікла паміж лідарамі дзвюх краін”.

“Агульны погляд на пытанні светабудовы, на развіццё сваіх дзяржаў, сацыяльную накіраванасць гэтага развіцця — усё гэта з’яўляецца цэментуючай асновай для выбудоўвання супрацоўніцтва па самым шырокім коле пытанняў”, — сказаў Рыжанкоў.

Міністр таксама заявіў, што гісторыі Беларусі і КНДР “вельмі падобныя” тым, што права на незалежнасць і суверэнітэт краіны “заваявалі ў жорсткай барацьбе коштам мільённых страт” і што “сёння пры руху ўласным шляхам развіцця вымушаныя адбівацца ад тых, хто хацеў бы, каб мы жылі па-іншаму”.

Візіт Лукашэнкі ў КНДР праходзіў 25–26 сакавіка.

26 сакавіка па выніках перамоваў Лукашэнкі і Кім Чэн Ына падпісаны дагавор аб дружбе і супрацоўніцтве паміж Беларуссю і Паўночнай Карэяй.

Лукашэнка падчас візіту запрасіў Кім Чэн Ына ў Беларусь.