У Польшчы на мяжы з Германіяй затрыманы грамадзянін Беларусі з выкрадзеным паўпрычэпам і нелегальным алкаголем
21 сакавіка, Позірк. Грамадзяніна Беларусі затрымалі на мяжы з Германіяй супрацоўнікі Нададжанскага аддзялення Памежнай службы Польшчы.
Паводле інфармацыі тэрытарыяльнага падраздзялення ведамства, беларус, які прыбыў з нямецкага боку ў пункт пропуску Свецка, вёз каля 6,2 тыс. літраў алкаголю без польскіх акцызных марак ацэначным коштам каля 900 тыс. злотых (каля 210 тыс. еўра).
Акрамя таго, паўпрычэп, які транспартаваў мужчына, быў выкрадзены ў Германіі; на ім былі падробленыя рэгістрацыйныя нумары.
“Кіроўца заявіў, што меўся толькі перавезці паўпрычэп праз мяжу за ўзнагароду ў 50 еўра”, — гаворыцца ў паведамленні.
Адзначаецца, што грамадзяніну Беларусі пагражае да 5 гадоў пазбаўлення волі.
