Улады Мінска падвышаюць кошт праезду ў грамадскім транспарце, з мінулага падаражання не прайшло года (дапоўнена)
дададзеныя абзацы 5–6
21 сакавіка, Позірк. Кошт праезду ў грамадскім транспарце сталіцы 27 сакавіка павялічыцца на 15 капеек, адпаведнае рашэнне прыняў Мінгарвыканкам.
Прэс-служба гарадскіх уладаў паведаміла, што кошт праезду ў аўтобусах, тралейбусах і трамваях складзе 1,1 рубля, метро — 1,15 рубля. Агульны праязны дакумент з месячным тэрмінам дзеяння будзе каштаваць 65,84 рублі.
“Нагадаем, што сабекошт паездкі ў наземным транспарце — 3,71 руб., у метрапалітэне — 2,93 руб. Акупнасць транспартных прадпрыемстваў [складае] 29% і 43% адпаведна. Усё астатняе датуецца з бюджэту Мінска”, — гаворыцца ў паведамленні.
Вызначаны “гранічны тарыф на перавозкі пасажыраў маршрутнымі таксі ў сталіцы” — 3,3 рубля. Падкрэслена, што гэты ліміт “абавязковы для ўсіх перавозчыкаў”, вышэйшым кошт “быць не можа”.
Згодна з рашэннем Мінгарвыканкама № 1016 ад 19 сакавіка, апублікаваным на Нацыянальным прававым інтэрнэт-партале, гранічны кошт адной паездкі на маршрутках паміж Мінскам і яго гарадамі-спадарожнікамі (Дзяржынск, Заслаўе, Лагойск, Рудзенск, Смалявічы і Фаніпаль) вызначаны ў памеры 5 рублёў. У паведамленні гарадскіх уладаў названыае толькі Заслаўе.
Максімальны тарыф на прыгарадныя аўтаперавозкі ў звычайных рэгулярных зносінах (за 1 кіламетр) — 14 капеек, хуткасных — 16 капеек, экспрэсных — 17 капеек. На прыгарадную перавозку багажу (за 1 км): за кожнае маламернае месца — 2 капейкі, сярэднемернае — 3 капейкі, буйнамернае — 6 капеек.
Папярэдні раз праезд у сталіцы даражэў менш за год таму — 10 красавіка 2025-го. Тады кошт разавай паслугі наземнага транспарту вырас да 95 капеек, метро — да 1 рубля. Да таго праезд стаў даражэй у траўні 2022 года — кошты былі павялічаныя на 10 капеек.
