Польшча выправадзіла грамадзяніна Беларусі, які адбыў пакаранне за забойства

21 сакавіка, Позірк. Грамадзянін Беларусі выдвараны з Польшчы з 10-гадовай забаронай на вяртанне ў краіну, а таксама забаронай на ўезд у Шэнгенскую зону, паведаміў 20 сакавіка Надбужанскі аддзел польскай Памежнай аховы.

Паводле інфармацыі ведамства, мужчына “адбываў пакаранне ў выглядзе пазбаўлення волі ў сувязі з вынесеным у дачыненні да яго судовым прыгаворам за здзяйсненне забойства”.

Прэс-служба Памежнай аховы адзначыла, што беларус, затрыманы пасля выхаду з папраўчай установы, прызнаны “пагрозай для бяспекі”.

“Замежнік пакінуў Польшчу праз памежны пераход у Тэрэспалі (з беларускага боку пункт пропуску Брэст. — “Позірк”.) і атрымаў 10-гадовую забарону на ўезд у Рэспубліку Польшча і Шэнгенскую зону”, — гаворыцца ў паведамленні.

У сярэдзіне гэтага тыдня праваабарончая ініцыятыва Dissidentby паведаміла, што, згодна з атрыманымі ёю данымі Памежнай аховы, за апошнія 2,5 месяца на патрабаванне ўладаў Польшчы краіну добраахвотна ці прымусова пакінула 192 грамадзяніны Беларусі.

У 2025 годзе польскае памежнае ведамства выканала больш за 9,4 тыс. рашэнняў, якія прадпісваюць замежнікам пакінуць тэрыторыю краіны ў добраахвотным або прымусовым парадку, паведамляў раней партал Onet.pl, які атрымаў адпаведныя даныя ў адказ на свой зварот у ведамства.

Грамадзян Беларусі тычылася амаль 1,3 тыс. (медыя аперавала прыблізнымі лічбамі), ці крыху менш за 14% усіх рашэнняў. Адзначалася, што з гэтай колькасці “каля 130” беларусаў было выслана прымусова (прыкладна 10%).

Згодна з прадстаўленымі ў матэрыяле данымі, за 2024 год (у гэтым выпадку выкарыстаныя дакладныя лічбы) з Польшчы дэпартавалі 1.377 грамадзян Беларусі, у тым ліку ў прымусовым парадку — 66.