ЗША знялі санкцыі з двух беларускіх банкаў і Мінфіна — прэс-служба Лукашэнкі

19 сакавіка, Позірк. Аб зняцці амерыканскіх санкцый з ААТ “Белінвестбанк”, ААТ “Банк развіцця Рэспублікі Беларусь” і Міністэрства фінансаў паведаміў неафіцыйны канал прэс-службы Аляксандра Лукашэнкі “Пул Первого” са спасылкай на заяву спецпасланніка прэзідэнта ЗША па Беларусі Джона Коўла.

Таксама зазначаецца, што “з усіх санкцыйных спісаў выключаны Беларуская калійная кампанія і “Беларуськалій“.

Згодна з актуальнай інфармацыяй на сайце Мінфіна ЗША, пад санкцыямі з дзеючых цяпер банкаў Беларусі акрамя двух згаданых знаходзяцца ААТ “Банк БелЗЭБ”, ААТ “Банк “Дабрабыт”, ЗАТ “ТК Банк” ААТ “Сбер Банк” (фігуруе пад ранейшай назвай ААТ “БПБ-Ашчадбанк”) і ЗАТ “Банк”.

Коўл наведаў Мінск 19 сакавіка і сустрэўся з Аляксандрам Лукашэнкам.