Сельгасвытворчасць у студзені — лютым павялічылася на 2,8%

17 сакавіка, Позірк. Вытворчасць прадукцыі ў гаспадарках усіх катэгорый (сельгасарганізацый, фермерскіх, насельніцтва) у студзені — лютым 2026 года ў бягучых цэнах склала 3 млрд 631,2 млн рублёў — у супастаўных цэнах на 2,8% больш, чым за аналагічны перыяд 2025-га, паведамляе Нацыянальны статыстычны камітэт.

У студзені вытворчасць у бягучых цэнах склала 1 млрд 935,5 млн рублёў (+3,5%).

У гаспадарках усіх катэгорый выраблена жывёлы і птушкі (у жывой вазе) 298,9 тыс. т (+3,9%), малака — 1.447,2 тыс. (+2,7%), яек — 568 млн шт. (-0,1%).

У 2025 годзе сельскагаспадарчая вытворчасць павялічылася на 0,2% (годам раней +3,4%): у студзені — на 3,3% (+4,3%), студзені — лютым — на 1,2% (+6,9%), студзені — сакавіку — на 1,7% (+6,8%), студзені — красавіку — на 1,5% (+6,9%); у студзені — траўні зафіксавана падзенне на 1% (+8,1%), студзені — чэрвені — на 2,7% (+10,2%), студзені — ліпені — на 12,7% (+18,1%), студзені — жніўні — на 0,3% (+7,1%), студзені — верасні — на 1% (5,1%), студзені — кастрычніку — на 0,1% (+3,2%), студзені — лістападзе — на 0,02% (+3,3%).

Найбольшая ўдзельная вага ў агульным аб’ёме вытворчасці сельгаспрадукцыі ў мінулым годзе прыпала на Мінскую (25,1%) і Брэсцкую (23,8%) вобласці. Далей ідуць Гродзенская (17,6%), Гомельская (12,2%), Віцебская (10,9%) і Магілёўская (10,3%) вобласці.

На долю сельгасарганізацый прыпадала 97,3% рэспубліканскага аб’ёму вытворчасці жывёлы і птушкі (у жывой вазе), малака — 97,9%, яек — 87,2%, збожжа — 95,5%, цукровых буракоў — 97%, бульбы — 12,5% і гародніны — 6,3%.

У сельгасарганізацыях выраблена жывёлы і птушкі (у жывой вазе) 1 млн 774,6 тыс. т (+0,1% да 2024 года), малака — 9 млн 2,3 тыс. т (+5,3%), яек — 3 млрд 399,7 млн шт. (+5,5%). Валавы збор збожжавых і зернебабовых культур склаў 8,7 млн т (+10,2%), цукровых буракоў — 5,7 млн т (+17,9%), бульбы — 379,9 тыс. т (+13%), гародніны — 169,7 тыс. т (+6,5%).

Намінальны налічаны сярэдні заробак работнікаў галіны ў снежні 2025-га склаў 2.431,1 рубля — на 21,9% менш, чым сярэдняя па краіне (3.112,7).

Даўгавая нагрузка арганізацый сельскай, лясной і рыбнай гаспадарак на пачатак 2026 года складала 5 млрд 23 млн (+15,6% у гадавым вымярэнні), пратэрмінаваная — 19,9 млн (-44,1%).