Топ-чыноўнікі ўрадаў Беларусі і Грузіі абмеркавалі двухбаковую супрацу, у тым ліку ў эканоміцы

16 сакавіка, Позірк. Стасункі паміж Беларуссю і Грузіяй, а таксама перспектывы далейшай супрацы абмеркавалі на сустрэчы 16 сакавіка ў Тбілісі беларускі віцэ-прэм’ер Юрый Шулейка і кіраўнік грузінскага ўрада Іраклі Кабахідзэ.

Паводле інфармацыі прэс-службы Кабінета міністраў Грузіі, падчас перагавораў былі разгледжаныя “актуальныя пытанні двухбаковага партнёрства, у тым ліку ў гандлёва-эканамічнай сферы”. Паведамляецца, што “была падкрэсленая роля Грузіі як бяспечнай краіны з пункту гледжання стварэння стабільнага, прадказальнага і спрыяльнага для інвестараў асяроддзя”.

Бакі адзначылі важнасць правядзення 7-га пасяджэння двухбаковай міжурадавай эканамічнай камісіі — для “абмеркавання актуальных эканамічных пытанняў паміж краінамі”.

Суразмоўцы таксама звярнулі ўвагу на “дадатную дынаміку ў сферы турызму і рост колькасці беларускіх турыстаў, якія наведваюць Грузію”.

У 2025 годзе Грузію наведала больш за 150 тыс. беларускіх грамадзян Беларусі — на 7% больш, чым у 2024-м, што дазволіла Беларусі ўвайсці ў топ-7 краін паводле колькасці турыстаў. Грузія з’яўляецца папулярным кірункам з бязвізавым уездам (да 360 дзён). З 2026 года для ўезду абавязковая медыцынская страхоўка.

Грузія стала адной з асноўных краін, куды эмігравалі беларусы, якія асцерагаліся рэпрэсій на радзіме пасля няўдалых масавых акцый пратэсту супраць фальсіфікацыі вынікаў прэзідэнцкіх выбараў-2020.

Паводле даных МУС Грузіі, на 1 студзеня 2025 года ў краіне пражывала 12.808 імігрантаў з беларускім грамадзянствам. За апошнія чатыры гады ў Грузію ўехала 20.952 беларусы (11.005 мужчын, 9.947 жанчын), выехала — 8.144 (4.406, 3.738).

Улады краіны, якой кіруе партыя “Грузінская мара” прарасійскага алігарха Бідзіны (Барыса) Іванішвілі, не задаволілі ніводнага хадайніцтва беларускіх грамадзян аб наданні прытулку. Аднак яны могуць няспынна знаходзіцца ў краіне на працягу года. Пасля гэтага, каб абнуліць тэрмін, неабходна выехаць на любы перыяд часу. Назад пускаюць не ўсіх. У зоне рызыкі найперш тыя, хто праяўляе публічную палітычную актыўнасць.

7 лютага дэмакратычны лідар Святлана Ціханоўская на слуханнях у Каардынацыйнай радзе прызнала складанае становішча беларускіх бежанцаў у Грузіі — улады краіны не будуць даваць ім міжнародную абарону, выдаваць замест пратэрмінаваных пашпартоў іншыя дакументы.