У Добрушскім раёне патануў рыбак

Дададзеныя абзацы 5–7.

15 сакавіка, Позірк. Пра ўтапленне ў Добрушскай раёне (Гомельская вобласць) мужчыны 1965 года нараджэння паведамляе Рэспубліканскае таварыства ратавання на водах (ТРВОД).

Яго цела 15 сакавіка вынята з вады ў пасёлку Зарадзвінне.

“Учора мужчына адправіўся на рыбалку, аднак вечарам не вярнуўся дадому, яго сваякі звярнуліся да ратавальнікаў”, — гаворыцца ў паведамленні.

Адзначаецца, што загінулы “знаходзіўся на глыбіні чатырох метраў без выратавальнай камізэлькі”.

Раённае выданне “Добрушскі край” паведаміла, што загінулы 60-гадовы мужчына пражываў у Гомелі. Прыехаўшы на рыбалку і “не пераканаўшыся ў трываласці пакрыцця, якое з выгляду падавалася тоўстым”, ён “выйшаў на лёд штучнага вадаёма і практычна адразу ж апынуўся ў вадзе”.

Паведамляецца, што ў гамяльчаніна была з сабой выратавальная камізэлька, аднак яна, “на жаль, засталася ляжаць у машыне“.

“Сонца грэе, лёд растае, ён стаў друзлым, выходзіць на яго цяпер смяротна небяспечна, — адзначыў начальнік добрушскай выратавальнай станцыі Вячаслаў Тамашаў. — У гэтым сезоне на Гомельшчыне адбылося некалькі няшчасных выпадкаў, звязаных з бестурботнасцю аматараў зімовай рыбалкі. Прычына — ігнараванне элементарных правілаў бяспекі”.

Паводле інфармацыі ТРВОД, у 2025 годзе зарэгістравана 492 здарэнні на вадаёмах, у тым ліку 54 — з непаўналетнімі (у 2024-м — 586 і 75 адпаведна; -16% і -28%).

Ад утаплення загінула 278 чалавек (368; -24,5%), у тым ліку 12 непаўналетніх (22; -45,5%).