Ціханоўская прызначыла Казлова прадстаўніком АПК па аднаўленні правапарадку

13 сакавіка, Позірк. Святлана Ціханоўская 13 сакавіка прызначыла Мікалая Казлова прадстаўніком Аб’яднанага пераходнага кабінета па аднаўленні правапарадку.

“Рашэнне прынятае на падставе рэкамендацый Каардынацыйнай рады, у адпаведнасці з працэдурай”, — паведаміла прэс-служба АПК.

11 сакавіка Каардынацыйная рада (КР) заслухала Казлова і па выніках галасавання на наступны дзень рэкамендавала прызначыць яго на пасаду.

31 студзеня Ціханоўская накіравала ў КР прапанову па кандыдаце прадстаўніка АПК па аднаўленні правапарадку. “Лічу, што ягоны багаты прафесійны досвед у галіне правааховы і ў грамадска-палітычнай дзейнасці, аўтарытэт сярод профільных арганізацый, а таксама асабістыя якасці дазволяць яму эфектыўна выконваць абавязкі на гэтай пасадзе”, — абгрунтавала дэмлідар свой выбар.

На слуханнях у КР Казлоў заявіў, што валодае “вялікім досведам у гэтай галіне” і ўжо “дастаткова шчыльна супрацоўнічае” з ініцыятывай BelPol, а таксама мае намер працаваць “з усімі [арганізацыямі] ў сферы праваахоўнай дзейнасці”.

Падчас ужо праведзеных кансультацый, адзначыў Казлоў, “вылучылі асноўныя напрамкі дзейнасці прадстаўніцтва: збор, аналіз інфармацыі пра супрацьпраўныя дзеянні супрацоўнікаў дзяржаўных органаў Беларусі, дакументаванне супрацьпраўнай дзейнасці, выпрацоўка рэкамендацый для грамадзян Беларусі па мерах бяспекі ва ўмовах, калі дзяржава парушае іх правы, супрацоўніцтва з партнёрскімі арганізацыямі ў распрацоўцы дакументаў па рэалізацыі правасуддзя пераходнага перыяду, выпрацоўка сумеснай стратэгіі, тактычная каардынацыя з партнёрскімі, беларускімі і міжнароднымі арганізацыямі”.

Адказваючы на пытанне пра сваю каманду, прэтэндэнт падкрэсліў, што пакуль не можа называць персаналіі.

Казлоў — былы старшыня Аб’яднанай грамадзянскай партыі (АГП) (ліквідаваная беларускімі ўладамі ў жніўні 2023 года), некалі супрацоўнік МУС, былы палітвязень. Нарадзіўся 5 студзеня 1967 года ў Валожыне, вырас у Нясвіжы (абодва гарады ў Мінскай вобласці). Скончыў Навасібірскае вышэйшае агульнавайсковае вучылішча, служыў у Закаўказзі і Сярэдняй Азіі, удзельнічаў у міратворчай місіі падчас Карабахскага канфлікту. Вярнуўся ў Беларусь пасля распаду СССР.

У 2008 годзе падчас назірання за галасаваннем на выбарах у Палату прадстаўнікоў у якасці супрацоўніка міліцыі абвінаваціў у фальсіфікацыі кіраўнікоў лакальнай выбарчай камісіі і неўзабаве звольніўся з МУС.

У лістападзе 2022 года быў асуджаны на 2,5 года пазбаўлення волі па абвінавачанні ў арганізацыі і ўдзеле ў масавых акцыях пратэсту супраць фальсіфікацыі вынікаў прэзідэнцкіх выбараў-2020. Выйшаў на свабоду ў ліпені 2024 года. Выехаў з Беларусі ў кастрычніку 2025 года.

Першым прадстаўніком АПК па аднаўленні правапарадку быў кіраўнік аб’яднання ByPol Аляксандр Азараў. У жніўні 2023 года КР абвясціла яму вотум недаверу, Ціханоўская як кіраўнік АПК вызваліла яго ад пасады. З таго часу гэтая пазіцыя ў кабінеце была вакантнай.