КР рэкамендавала Казлова на пасаду прадстаўніка АПК па аднаўленні правапарадку
Мікалай Казлоў
13 сакавіка, Позірк. Каардынацыйная рада рэкамендавала былога палітвязня Мікалая Казлова на пасаду прадстаўніка Аб’яднанага пераходнага кабінета па аднаўленні правапарадку.
За гэтае рашэнне з 44 дэлегатаў, якія ўзялі ўдзел у галасаванні 13 сакавіка, выступілі 35, супраць — 6, устрымаліся — 3, паведаміла прэс-служба КР.
Галасаванне па фракцыях: “Каманда Латушкі і рух “За свабоду” — 19, 1, 2 адпаведна, “Незалежныя беларусы” — 3, 0, 1, “Еўрапейскі выбар” — 6, 0, 0, “Наша справа / Беларускія хрысціянскія дэмакраты” — 3, 0, 0, “Хопіць баяцца” — 2, 0, 0, “Наступ” — 0, 5, 0, пазафракцыйныя дэлегаты — 2, 0, 0.
Слуханні КР па кандыдатуры Казлова прайшлі 11 сакавіка. Ён, у прыватнасці, заявіў, што валодае “вялікім досведам у гэтай галіне” і ўжо “дастаткова шчыльна супрацоўнічае” з ініцыятывай BelPol, а таксама мае намер працаваць “з усімі [арганізацыямі] ў сферы праваахоўнай дзейнасці”.
Падчас ужо праведзеных кансультацый, адзначыў Казлоў, “вылучылі асноўныя напрамкі дзейнасці прадстаўніцтва: збор, аналіз інфармацыі пра супрацьпраўныя дзеянні супрацоўнікаў дзяржаўных органаў Беларусі, дакументаванне супрацьпраўнай дзейнасці, выпрацоўка рэкамендацый для грамадзян Беларусі па мерах бяспекі ва ўмовах, калі дзяржава парушае іх правы, супрацоўніцтва з партнёрскімі арганізацыямі ў распрацоўцы дакументаў па рэалізацыі правасуддзя пераходнага перыяду, выпрацоўка сумеснай стратэгіі, тактычная каардынацыя з партнёрскімі, беларускімі і міжнароднымі арганізацыямі”.
Адказваючы на пытанне пра сваю каманду, прэтэндэнт падкрэсліў, што пакуль не можа называць персаналіі.
Былы старшыня Аб’яднанай грамадзянскай партыі (АГП) (ліквідавана беларускімі ўладамі), некалі супрацоўнік МУС, экс-палітвязень Мікалай Казлоў быў прапанаваны на пасаду прадстаўніка АПК па аднаўленні правапарадку дэмлідарам Святланай Ціханоўскай у студзені 2026 года.
Казлоў нарадзіўся 5 студзеня 1967 года ў Валожыне, вырас у Нясвіжы (абодва гарады ў Мінскай вобласці). Паводле даных АПК, скончыў Новасібірскае вышэйшае агульнавайсковае вучылішча, “служыў у Закаўказзі і Сярэдняй Азіі, удзельнічаў у міратворчай місіі падчас Карабахскага канфлікту”. Вярнуўся ў Беларусь пасля распаду СССР.
Першым прадстаўніком АПК па аднаўленні правапарадку быў кіраўнік аб’яднання ByPol Аляксандр Азараў. У жніўні 2023 года КР абвясціла яму вотум недаверу, Ціханоўская як кіраўніца АПК вызваліла яго ад пасады. З таго часу гэтая пазіцыя ў кабінеце вакантная.
Група былых сілавікоў з арганізацыі ByPol з ліпеня 2023 года дзейнічае як новая структура — BelPol. Цяпер у ёй працуюць не толькі выхадцы з сілавых структур.
