У Гомельскай вобласці перакрыты канал пастаўкі псіхатропаў з “суседняй краіны”

13 сакавіка, Позірк. 63-гадовага замежніка, які працаваў аптовым кур’ерам інтэрнэт-крамы па продажы наркатычных сродкаў, затрымалі супрацоўнікі наркакантролю Гомельскай вобласці “пры сілавой падтрымцы байцоў АМАП”, паведаміла 13 сакавіка прэс-служба Міністэрства ўнутраных спраў.

Мужчына, які, як сцвярджаецца, працаваў на наркашоп менш за месяц, быў затрыманы на месцы злачынства.

Паводле інфармацыі ведамства, замежнік “на ўказанне куратара забіраў у суседняй краіне буйныя партыі “тавара” і прывозіў у Беларусь для далейшай рэалізацыі”. Пасля ён фасаваў яго на здымнай кватэры і “распаўсюджваў праз закладкі” на тэрыторыі Гомельскай вобласці.

Паведамляецца, што ў тайніках і па месцы жыхарства мужчыны знойдзена і вынята 2 кг “асабліва небяспечнага псіхатропнага рэчыва мефедрон”.

Распачатая крымінальная справа, фігуранту пагражае да 20 гадоў зняволення.

Адметна, што МУС не называе грамадзянства затрыманага. Цяпер выехаць з Беларусі ў краіны Еўрасаюза і вярнуцца назад дастаткова складана — на мяжы праводзіцца строгі кантроль, пра затрыманне наркотыкаў паведамляюць мытныя органы. Мяжа з Украінай закрытая. Найменшы кантроль — на мяжы з Расіяй.

У лістападзе 2024 года аб’яднанне BelPol, спасылаючыся на аналітычную даведку МУС, якая трапіла ў яго распараджэнне, адзначыла, што галоўным пастаўшчыком наркотыкаў і псіхатропаў у Беларусь з’яўляецца РФ.

Як паведамляў “Позірк”, паводле даных Вярхоўнага суда, у 2025 годзе колькасць асуджаных паводле “наркатычных” артыкулаў Крымінальнага кодэкса павялічылася на 7,9% у параўнанні з 2024-м.

За здзяйсненне злачынстваў, звязаных з незаконным абаротам наркотыкаў (арт. 327–331, 332), летась было асуджана 2.253 чалавекі — 8% усіх асуджаных (у 2024-м — 2.088; 6,6%).

З іх 2.077, ці 92,2%, прызнана вінаватымі паводле арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў), у 2024 годзе — 1.956, або 93,7%.

На прэс-канферэнцыі 26 лютага ў Мінску намеснік начальніка галоўнага ўпраўлення па наркакантролі і супрацьдзеянні гандлю людзьмі Міністэрства ўнутраных спраў Андрэй Кудрыцкі паведаміў, што ў 2025 годзе спынена дзейнасць 39 інтэрнэт-крам па распаўсюдзе наркотыкаў.